तालुक्यात कोरोनाची पुन्हा झाली एन्ट्री

गोंदिया : मागील महिनाभरापासून कोरोनामुक्त असलेल्या गोंदिया तालुक्यात पुन्हा कोरोना शिरला असून सोमवारच्या (दि.१३) अहवालात एका बाधिताची नोंद घेण्यात आली आहे. विशेष म्हणजे, कोरोना आला तेव्हापासून तालुका हॉटस्पॉट असून झपाट्याने बाधितांची संख्या वाढताना दिसून आली आहे. अशात आता तरी नागरिकांनी संयम बाळगून वावरणे हेच सर्वांसाठी सुरक्षेचे ठरणार आहे.

दुसऱ्या लाटेच्या कहरातून सावरत आलेल्या जिल्ह्यात नागरिकांच्या संयमानेच परिस्थिती सुधारताना दिसून येत आहे. हेच कारण आहे की, मे महिन्यातील पंधरवड्यानंतर जिल्ह्यात कोरोना परिस्थिती नियंत्रणात आली व आजही जिल्ह्यात कोरोनाला पाय पसरता आले नाही. त्यातही विशेष बाब म्हणजे, गोंदिया व तिरोडा हे प्रमुख हॉटस्पॉट कोरोनामुक्त झाल्याने धोका कमी झाला होता. यामुळेच नागरिक चांगलेच बिनधास्तपणे वावरत आहेत. जिल्ह्यात बाधितांची संख्या कमी-जास्त होत असतानाच मध्यंतरी ती ८ पर्यंत पोहोचली होती.

त्यानंतर आता आकडेवारी घसरली असून जिल्ह्यात आता फक्त २ बाधित उरले आहेत. यात मात्र धोक्याची बाब म्हणजे, यातील एक बाधित गोंदिया तालुक्यातील असून दुसरा बाधित देवरी तालुक्यातील आहे. कोरोनाच्या सुरुवातीपासूनच गोंदिया तालुका हॉटस्पॉट ठरला आहे. त्यात आता १ का असोना मात्र बाधित आढळल्याने पुन्हा कोरोना शिरला असून धोका वाढला आहे.

------------------------------

त्रिसूत्रीचे पालन गरजेचे

कोरोनापासून बचावासाठी आपल्या हाती आता लस आली आहे. मात्र, कित्येक नागरिक लसीकरणाला पाठ दाखवीत असल्याने हा प्रकार धोक्याचा आहे. त्यानंतर तोंडावर मास्क, सॅनिटायझर-साबणाने हात स्वच्छ धुणे व शारीरिक अंतराचे पालन या त्रिसूत्रीने आता जाणेच गरजेचे झाले आहे.

-----------------------------

लस न घेतलेली एक व्यक्तीही धोक्याची

कोरोनाची लस घेतल्याने एकतर त्या व्यक्तीवर कोरोना हावी होत नाही. शिवाय त्या व्यक्तीपासून दुसऱ्याला लागण होण्याची शक्यता शून्य आहे. म्हणजेच, लस घेतलेला व्यक्ती स्वत: सुरक्षित असून त्यापासून अन्य कुणालाही धोका नाही. मात्र, लस घेतलेल्या व्यक्तीला कोरोनापासून धोका असतानाच त्यापासून अन्य व्यक्तींनाही लागण होण्याची शक्यता आहे. यामुळे अशी एकही व्यक्ती आता लसीपासून वंचित राहून नये ही खबरदारी घेण्याची गरज आहे.