काँग्रेस कार्यकर्त्यांनी प्रकट केला विरोध

भारताचे पहिले पंतप्रधान पं. जवाहरलाल नेहरू यांच्या गोंदिया येथील प्रतिमेची उपेक्षा होत असल्याचा आरोप करीत

गोंदिया : भारताचे पहिले पंतप्रधान पं. जवाहरलाल नेहरू यांच्या गोंदिया येथील प्रतिमेची उपेक्षा होत असल्याचा आरोप करीत काँग्रेस कार्यकर्त्यांनी असंतोष व्यक्त करणारे निवेदन उपविभागीय अधिकारी यांना दिले आहे. जवाहरलाल नेहरू यांच्या ५२ व्या पुण्यतिथीनिमित्त श्रध्दांजली वाहण्यासाठी नेहरु चौकातील पुतळ्याजवळ काँग्रेस कार्यकर्ते गेले असताना या पुतळ्याजवळ लावलेले होर्र्डिंग पाहून कार्यकर्त्यांमध्ये तीव्र असंतोष पसरला. श्रध्दांजली वाहिल्यानंतर उपविभागीय अधिकाऱ्यांना या संदर्भात निवेदन देण्याचे ठरविण्यात आले. उपविभागीय अधिकारी के.एन.के. राव यांच्याशी काँग्रेस कार्यकर्त्यांनी चर्चा करून पुतळ्याची होत असलेली उपेक्षा मांडली. यावर राव यांनी न.प. प्रभारी मुख्याधिकारी के.डी. मेश्राम यांच्याशी मोबाईलवर चर्चा करून कार्यवाही करण्याचे सुचविले. त्यांच्या जयंती दिनी नगर परिषदेने ही चूक केल्याचे लक्षात आले होते. निवेदन देणाऱ्या शिष्टमंडळात शहर काँग्रेस कमिटीचे अध्यक्ष अशोक चौधरी, जिल्हा प्रवक्ता अनिल गौतम, सेवालदाचे अध्यक्ष पन्नालाल शहारे, महासचिव अमर वऱ्हाडे, शहर काँग्रेस अपूर्व अग्रवाल, मनोज पटनायक, उपाध्यक्ष महेश माधवानी, नगर सेवक व्यंकट पाथरू, नामदेवराव बिसेन, दत्ता तिराले, सुशील रहांगडाले, आशा आठवले, बलजितसिंग बग्गा, नफी सिद्दीकी, सलीना सरोजकर, पदमकांत चौधरी, राजू तावाडे व कार्यकर्ते उपस्थित होते. (तालुका प्रतिनिधी)