जिल्ह्यात चार महिन्यांत १९४० ‘सुकन्यां’चे खाते

आपल्या चिमुकलीच्या शिक्षण व विवाहासाठी पैशांची सोय व्हावी या उद्देशातून केंद्र शासनाने ‘सुकन्या समृद्धी खाते’ योजना सुरू केली आहे.

गोंदिया : आपल्या चिमुकलीच्या शिक्षण व विवाहासाठी पैशांची सोय व्हावी या उद्देशातून केंद्र शासनाने ‘सुकन्या समृद्धी खाते’ योजना सुरू केली आहे. डाकघरांच्या माध्यमातून राबविण्यात येत असलेल्या योजनेंतर्गत कमीत कमी एक हजार रूपयांत खाते उघडण्याची सोय आहे. मात्र जिल्ह्यात या योजनेला अत्यल्प प्रतिसाद लाभत असल्याचे दिसत येत आहे. यात आमगाव तालुका अग्रेसर असून तेथे ३६९ चिमुकलींचे खाते उघडण्यात आले आहेत.
देशात आजही मुलीला शाप किंवा ओझे समजले जात आहे. यामुळेच पोटात मुलगी असल्याचे जाणून घेण्यासाठी तसेच मुलीचे भ्रूण असल्याचे कळताच तिला मारले जात आहे. एवढेच नव्हे तर मुलगी झाल्यास तिला लावारीस टाकण्यात येत असल्याचे प्रकारही उघडकीस येत आहे. परिणामी देशात मुलींच्या संख्येत झपाट्याने घट होत चालली आहे. ही एक गंभीर बाब निर्माण होत आहे. आजची मुलगी मुलापेक्षा कमी नसून याची कित्येक उदाहरणे पुढे आहेत. अनेक मुली आपल्या पालकांच्या पोषणकर्त्यांची भूमिका बजावत असल्याचेही कित्येक उदाहरण असून मुली शाप नसून एक वरदान ठरत आहेत. मुलगी होताच तिच्या शिक्षण व लग्नाची समस्या पालकांना भेडसावू लागते. मात्र मुलीच्या या खर्चांत शासनाकडून होतभार लावता यावा व पालकांचे टेंशन कमी करता यावे या उद्देशातून केंद्र शासनाने खास मुलींसाठी ‘सुकन्या समृद्धी खाते’ ही योजना सुरू केली.
२२ जानेवारी २०१५ सुरू करण्यात आलेल्या या योजनेत परिपक्वतेत जमा रकमेवर भरघोस व्याज देऊन मुलीच्या शिक्षण व लग्नाची सोय केली जाते. विशेष म्हणजे या योजनेची तशी अट ठरवून देण्यात आली आहे. जिल्ह्यात या योजनेंतर्गत ३० एप्रिलपर्यंत एक हजार ९१० खाते उघडण्यात आले आहेत. यात विशेष बाब म्हणजे आमगाव तालुका अग्रेसर असून येथे सर्वाधीक ३६९ खाते उघडण्यात आले आहे. तर अर्जुनी मोरगाव पोस्ट आॅफीसमध्ये ७६, देवरी पोस्ट आॅफीसमध्ये ८९, गोरेगाव पोस्ट आॅफीसमध्ये २३३, नवेगावबांध पोस्ट आॅफीसमध्ये १४, सडक अर्जुनी पोस्ट आॅफीसमध्ये ८७, सालेकसा पोस्ट आफीसमध्ये ८६, सौंदड पोस्ट आफीसमध्ये ७०, तिरोड पोस्ट आफीसमध्ये १११, गोंदिया बाजार पोस्ट आफीसमध्ये १९२, गोंदिया शहर (रेलटोली) पोस्ट आफीसमध्ये ३०३ तर गोंदिया मुख्यालयात २८० खाते उघडण्यात आले आहेत. (शहर प्रतिनिधी)