१०५ वाहनांचे परवाने निलंबित

गोंदिया : जिल्ह्यात अवैध गौण खनिज चोरीला आळा घालण्यासाठी जिल्हा प्रशासनाकडून गौण खनिज चोरी करणाऱ्यांवर दंड ठोठावण्यात येत आहे. परंतु अवैध गौण खनिज वाहतूक करणाऱ्या १०५ वाहनांचे नोंदणी परवाने निलंबित करण्याची कार्यवाही उपप्रादेशिक परिवहन अधिकारी यांच्या मार्फत शुक्रवारी (दि.२२) करण्यात आली आहे.

अवैध गौण खनिज वाहतूक प्रकरणात महसूल अधिकारी-कर्मचारी हे रात्रंदिवस गस्त लावतात. त्यांच्यावर हल्ले देखील झाले असून जिल्हाधिकाऱ्यांनी गौण खनिज खनन प्रकरणात बैठक घेऊन पोलीस अधीक्षकांना कठोर कारवाई करण्याचे निर्देश दिले आहे. गौण खनिज अवैध खनन व अवैध वाहतूक प्रकरणात एकूण १०५ वाहनांवर मोटार वाहन कायदा १९८८ व १९८९ अंतर्गत कारवाई करण्यात आली आहे. या वाहनांचे नोंदणी परवाने निलंबन करण्याची कारवाई झाल्यानंतर आता ही वाहने रस्त्यावर धावू शकणार नाही. या वाहनांना पुढील ९० दिवस पोलिसांच्या ताब्यात देण्याची कार्यवाही जिल्हाधिकाऱ्यांच्या निर्देशान्वये करण्यात आली आहे.

कारवाई करण्यात आलेल्या १०५ वाहनांमध्ये गोंदिया ग्रामीण ठाणे १५ वाहन, रावणवाडी ३९ वाहन, अर्जुनी-मोरगाव २० वाहन, देवरी ५ वाहन, गोरेगाव ६ वाहन, दवनीवाडा १८ वाहन, गंगाझरी १ आणि रामनगर गोंदिया येथील १ वाहन आहे. तसेच नोंदणी-परवाना निलंबन केलेल्या ९२ ट्रॅक्टर, ट्राली ७४, ट्रक-टिप्पर ४, नंबर प्लेट नसलेले ट्रॅक्टर ४४, नंबर प्लेट नसलेली ट्राॅली २६, इतर राज्यातील ट्रॅक्टर २, इतर राज्यातील ट्राली १ आणि इतर राज्यातील १ टिप्परचा समावेश आहे. भविष्यात अवैध खनिज खनन प्रकरणात आढळल्यास कठोर कार्यवाही करण्याचे निर्देश जिल्हाधिकाऱ्यांनी दिले आहेत.