कर्नाटकला अवमान नोटीस

पणजी : म्हादई पाणीप्रश्नी लवादाने दिलेल्या आदेशाची अंमलबजावणी करण्याबाबत अक्षम्य चालढकलपणा करण्याच्या कर्नाटक सरकारच्या कृतीची गोवा सरकारने गंभीरपणे दखल घेतली आहे. कर्नाटकला गोव्याने अवमान नोटीस पाठवली असून त्या नोटिशीनंतर कर्नाटकच्या शासकीय पातळीवर धावपळ सुरू झाल्याची माहिती गोवा सरकारला मिळाली आहे. कर्नाटककडून म्हादईचे पाणी वळविले जाऊ नये म्हणून आवश्यक उपाययोजना करण्यास म्हादई पाणी तंटा लवादाने यापूर्वी आपल्या अंतरिम आदेशाद्वारे सांगितले आहे. लवादाच्या सूचनेनुसार कर्नाटकने स्वखर्चाने बांध तसेच भिंत वगैरे बांधणे गरजेचे आहे. तथापि, कर्नाटक सरकार हे काम करत नसल्याची माहिती मिळाल्यानंतर गोव्याचे अ‍ॅडव्होकेट जनरल आत्माराम नाडकर्णी यांनी कर्नाटकला अवमान नोटीस पाठवावी, असा सल्ला गोवा सरकारला दिला. त्यानुसार सरकारने पाठवलेली नोटीस कर्नाटकला गुरुवारी मिळाली व धावपळ सुरू झाली. कर्नाटकचे जलस्रोतमंत्री, प्रधान जलस्रोत सचिव आणि जलस्रोत खात्याचे मुख्य अभियंते यांना आरोपीच्या पिंजर्‍यात उभे केले जाईल, असे गोवा सरकारने नोटिशीद्वारे बजावले. यामुळे आता शुक्रवारपासून युद्धपातळीवर कणकुंबीच्या बाजूने म्हादई नदीच्या कक्षेत कर्नाटकच्या यंत्रणेकडून उपाययोजनांचे काम सुरू होणार आहे. गुरुवारी सायंकाळी तिथे ट्रकमधून बांधकाम साहित्य आणून टाकण्यात आले आहे, अशीही माहिती गोवा सरकारला मिळाली आहे. खरोखर काम सुरू होतेय की नाही, हे पाहण्यासाठी गोव्याचे अ‍ॅडव्होकेट जनरल नाडकर्णी हे तिथे भेट देणार आहेत. गोव्याचे जलस्रोत सचिव परिमल रे हेही त्यांच्यासोबत जाण्याची शक्यता आहे. गोवा-कर्नाटक दरम्यानच्या पाणी तंट्याबाबत लवादासमोर सुनावणी सुरू आहे. कर्नाटक लवादाच्याही सूचनांचे नीट पालन करीत नसल्याने गोवा सरकार नाराज झाले आहे. कर्नाटकविरुद्ध सर्वोच्च न्यायालयात अवमान याचिका सादर करण्याची भूमिका गोव्याने घेतल्यामुळे आता लवादाच्या सूचनांचे पालन होईल, असा विश्वास काही अधिकार्‍यांना वाटतो. (खास प्रतिनिधी)