पणजीत आंदोलक खाण अवलंबितांनी पावणेतीन तास दोन्ही मांडवी पूल रोखले, पोलिसांकडून अखेर लाठीहल्ला

खाण अवलंबितांनी सोमवारी दोन्ही मांडवी पूल रोखून जनतेला तब्बल पावणेतीन तास वेठीस धरले.

पणजी : खाण अवलंबितांनी सोमवारी दोन्ही मांडवी पूल रोखून जनतेला तब्बल पावणेतीन तास वेठीस धरले. राजधानी शहराच्या प्रवेशव्दारावर कोंडी करण्यात आल्याने अनेक वाहने यात अडकली तसेच विद्यार्थ्यांचीही परवड झाली. रस्ता मोकळा करण्यास आंदोलक तयार नव्हते. पाच वाहनांची नासधूस करण्यात आली तसेच पोलिसांवर दगडफेक केली त्यात ५ पोलिस जखमी झाले. आंदोलनाने हिंसक वळण घेतल्याने अखेर पोलिसांना लाठीहल्ला करावा लागला. यात ३ आंदोलक  जखमी झाले. सार्वजनिक मालमत्तेची हानी केल्या प्रकरणी ११ जणांना अटक करण्यात आली. न्यायदंडाधिऱ्यांनी दुपारी २.४५ च्या सुमारास लाठीहल्ल्याचा आदेश दिल्यावर पोलिसांनी अक्षरश: आंदोलकांची धुलाई केली यात काही बघ्यांनाही लाठीचा प्रसाद खावा लागला. आमदार नीलेश काब्राल आंदोलकांमध्ये होते. महाराष्ट्रातून पोलीस कुमक मागविली होती. या पोलिसांनी आमदार काब्राल यांना ओळखले नाही. काब्राल यांच्याही उजव्या हाताला लाठी लागली. लाठी हल्ल्यात ट्रकमालक संघटनेचे नेते महेश गांवस तसेच अन्य जखमी झाले. काहींची डोकी फुटली त्यामुळे रक्ताळलेल्या अवस्थेत त्यांना तेथून हलवावे लागले. जुन्या मांडवी पुलाजवळ लाढीहल्ला झाल्यावर आंदोलक सैरावैरा पळत सुटले काहीजण लोखंडी कुंपणावरुन उड्या टाकून बाजुच्या आंबेडकर मैदानात पळाले तर काहीजणांनी कदंब स्थानकाच्या दिशेने धूम ठोकली. पोलिसांनी पाठालाग करुन एकेकाला लाठीने चोप दिला व नंतर जीपगाड्यांमध्ये कोंबून पोलिस स्थानकात रवानगी केली. पोलिस महासंचालक मुक्तेश चंदर यावेळी जातीने हजर होते आणि पोलिसांना आवश्यक त्या सूचना देत होते. तत्पूर्वी ट्रकमालक तसेच अन्य अवलंबित मोठ्या संख्येने सकाळी ११ च्या सुमारास येथील बसस्थानकासमोर क्रांती सर्कलजवळ जमले. तेथून खरे तर आधी ठरल्याप्रमाणे ते आझाद मैदानावर जाणार होते परंतु अचानक पवित्रा बदलून आधी जुना पूल आणि नंतर नवा मांडवी पूल आंदोलकांनी अडविला. राष्ट्रीय महामार्ग १७ अ खाली हे पूल येतात. महामार्ग ठप्प झाल्याने दोन्ही बाजुची वाहने अडकून पडली आणि बसस्थानकातून बसगाड्या बाहेर पडू शकल्या नाहीत किंवा आतही येऊ शकल्या नाहीत. प्रवाशांचे यामुळे अतोनात हाल झाले. रस्ते अडविल्याने वाहतूक कोंडीत अडकून पडलेल्या दुचाकीस्वारांना रखरखित उन्हात तासन्तास ताटकळत रहावे लागले. कुजिरा शाळा संकुलातही वेगवेगळ्या शाळांची सातशे ते आठशे मुले बसेस येऊ न शकल्याने अडकून पडली. खाणी विनाविलंब चालू कराव्यात या मागणीसाठी आंदोलन हातात फलक घेऊन सरकारविरुध्द जोरदार घोषणाबाजी करीत होते. निषेध म्हणून त्यांनी राज्य सरकार तसेच केंद्र सरकारचे व खाणविरोधी चळवळीतील ज्येष्ठ कार्यकर्ते तथा पर्यावरणप्रेमी क्लॉड आल्वारिस यांचे पुतळे जाळले. एका सरकारची जीपगाडी पंक्चर केली. अनेक दुचाकीधारकांना धाकदपटशा दाखवत दुचाक्यांच्या चाव्या काढून घेतल्या. तसेच एका दुचाकीचीही नासधुस केली. वाहनांना आग लावण्याची भाषाही आंदोलक करु लागले होते. राज्य पोलिस, आयआरबी, केंद्रीय राखीव पोलिस दल तसेच महाराष्ट्र पोलिस असा प्रचंड फौजफाटा यावेळी तैनात करण्यात आला होता आणि त्यांच्या उपस्थितीतच हा सर्व प्रकार चालला होता. उत्तर गोवा जिल्हाधिकारी नीला मोहनन् आंदोलकांना वारंवार रस्ता मोकळा करण्याची विनंती करीत होत्या परंतु जमाव त्यांचे काहीही ऐकण्याच्या मन:स्थितीत नव्हता. यामुळे आंदोलक आणि मोहनन् यांच्या शाब्दिक चकमकी झडण्याचे प्रकारही घडले. आंदोलक काबूत येत नसल्याचे व अधिकच हिंसक बनत असल्याचे पाहून अखेर लाठीहल्याचा आदेश देण्यात आला. सर्वोच्च न्यायालयाने गेल्या ७ फेब्रुवारी रोजी आदेशात गोव्यातील सर्व ८८ खाण लीज रद्द करुन त्यांचा लिलांव करण्याचा आदेश सरकारला दिला आहे. १६ मार्चपासून खाणी बंद झालेल्या असून खाण अवलंबित ट्रकमालक, बार्जमालक, मशिनरीमालक यांचा खाणी लवकरात सुरु केल्या जाव्यात अशी मागणी आहे.