इस्रायली अटालाकडे आधार कार्ड कसे? कागदपत्रे सादर करा; हायकोर्टाचे यूआयडीएआयला आदेश

अटालाला आधार कार्ड मंजूर केल्या प्रकरणात उच्च न्यायालयाने यूआयडीएआयवर कायद्याचा बडगा उगारला आहे.

लोकमत न्यूज नेटवर्क, पणजी : इस्रायली ड्रग्स डीलर अटाला ऊर्फ यानीव बेनाईम याला आधार कार्ड कोणत्या आधारावर मंजूर केले. त्याची कागदपत्रांसह सविस्तर माहिती न्यायालयात सादर करण्याचा आदेश मुंबई उच्च न्यायालयाच्यागोवा खंडपीठाने युनिक आयडेन्टिफिकेशन अॅथॉरिटी ऑफ इंडियाला (यूआयडीएआय) दिला आहे. 

अटालाला आधार कार्ड मंजूर केल्या प्रकरणात उच्च न्यायालयाने यूआयडीएआयवर कायद्याचा बडगा उगारला आहे. या प्रकरणात न्यायालयात सविस्तर कागदपत्रे सादर करण्यात यावीत, असे न्यायालयाने म्हटले आहे. आधार कार्डसाठी अर्ज करताना अटालाने कोणती माहिती व कागदपत्रे सादर केली होती, तसेच कोणत्या निकषांवर आधार कार्ड मंजूर केले आणि त्याने कागदपत्रे कोणती सादर केली होती याची माहिती यूआयडीएआयला सादर करावी लागेल. १७ जूनपूर्वी ही कागदपत्रे सादर करावी लागणार आहेत.

'त्या' संस्थेचीही माहिती द्या

ज्या अधिकृत नोंदणी संस्थेद्वारे त्याचा अर्ज प्राप्त झाला होता त्या संस्थेची माहितीही न्यायालयाने मागितली आहे. ती माहितीही या प्रकरणातील फाइलमध्ये असावी, असे न्यायालयाने म्हटले आहे. पुढील सुनावणी १९ जून रोजी होणार आहे.

काय आहे प्रकरण...

ड्रग्स प्रकरणात खटला सुरू असतानाही पुन्हा ड्रग्स व्यवहार करीत असल्याचे आढळून आल्यानंतर अटाला याला अमली पदार्थ विरोधी विभागाडून शिवोली येथून अटक केली होती. त्याच्याकडे अमली पदार्थाबरोबर आधार कार्डही सापडले होते. ड्रग्स प्रकरणाचा अमली पदार्थ विरोधी विभाग तपास करत आहे, तर आधार कार्ड प्रकरणात हणजूण पोलिसांकडून तपास सुरू आहे. तपासावेळी हे आधार कार्ड छाननीसाठी यूआयडीएआयकडे पाठविण्यात आले होते. यूआयडीआयकडून हे आधार कार्ड वैध असल्याचा निर्वाळा दिला होता. त्यामुळे आधार कार्डसाठी अटालाने सादर केलेली कागदत्रांची मागणी पोलिसांनी केली होती; परंतु या प्रकरणात यूआयडीएआयकडून सहकार्य होत नसल्यामुळे हे प्रकरण न्यायालयात नेले होते.