पणजी - मालवणात बेकायदा एलईडी मासेमारी प्रकरणात पकडलेल्या गेलेल्या ट्रॉलरचे मालक, गोव्याचे आमदार फ्रान्सिस सिल्वेरा यांना तेथील तहसीलदारांनी ३ लाख रुपये दंड ठोठावला असून ट्रॉलरचा परवाना रद्द केला आहे. हा ट्रॉलर जप्त करण्यात आला आहे. मालवणच्या तहसीलदारांनी नोटिस बजावून सिल्वेरा यांना सुनावणीसाठी उपस्थित राहण्यास सांगितले होते. १९८१ च्या महाराष्ट्र सागरी मच्छिमारी कायद्यानुसार तहसीलदारांनी ही नोटीस त्यांना बजावली होती. परंतु सिल्वेरा हे सुनावणीसाठी उपस्थित राहिले नाहीत.
मालवणच्या गस्ती नौकेवरील मच्छिमारी अधिकाऱ्यांनी गेल्या गुरुवारी मालवणमध्ये हा ट्रॉलर पकडला होता. त्यानंतर हा ट्रॉलर गोव्यातील सांत आंद्रे मतदारसंघाचे आमदार फ्रान्सिस सिल्वेरा यांच्या मालकीचा असल्याचे निष्पन्न झाले होते. एलईडी दिवे वापरून मासेमारी करण्यास देशभरात बंदी आहे. असे असतानाही या ट्रॉलरव्दारे एलईडीचा वापर करून मासेमारी केली जात होती. ट्रॉलरवर सुमारे ६0 हजार रुपये किमतीची मासळी होती ती जप्त करुन तेथील मच्छिमारी अधिकाऱ्यांनी नंतर हे प्रकरण महसूल खात्याकडे पाठवले.
दरम्यान, गोव्यातील पारंपरिक मच्छिमारांच्या ‘गोंयच्या रांपणकारांचो एकवोट’ या संघटनेचे अध्यक्ष आग्नेल रॉड्रिग्स यांनी याबाबत प्रतिक्रिया देताना आमदार सिल्वेरा यांचा ट्रॉलर पकडला गेला आणि आता त्यांना दंडही ठोठावण्यात आला ही सरकारसाठी लज्जास्पद गोष्ट असल्याचे म्हटले आहे. आमदार सिल्वेरा यांची प्रतिक्रिया जाणून घेण्यासाठी फोन केला असता संपर्क होऊ शकला नाही.