गोव्यात चाललेय काय? आरोग्य मंत्र्यांकडून सीएमओचे काल निलंबन, आज मुख्यमंत्र्यांनी केले रद्द

Goa CMO Trending News: राणे यांनी या डॉक्टरांना गरीबांवर उपचार करत नसल्याच्या तक्रारीवरून झापले होते. यात मोठा ट्विस्ट आला आहे.

गोव्यात बांबोळीच्या गोमेकॉ इस्पितळात येत आरोग्यमंत्री विश्वजीत राणे यांनी मुख्य वैद्यकीय अधिकाऱ्यांना तातडीने निलंबित करण्याचे आदेश दिले होते. यावेळी राणे यांनी या डॉक्टरांना गरीबांवर उपचार करत नसल्याच्या तक्रारीवरून झापले होते. यात मोठा ट्विस्ट आला आहे. राणे यांनी शनिवारी या डॉक्टरचे निलंबन केले होते, तर मुख्यमंत्री प्रमोद सावंत यांनी हे निलंबन आज रद्द केले आहे. 

रुग्णाला घेऊन आलेल्या नातेवाईकाच्या फोनवरून राणे यांनी ही कारवाई केली होती. गोमेकॉत आलेल्या रुग्णाला शहर आरोग्य केंद्रात जाण्यास सांगण्यात आले होते. यावर संतापलेल्या राणे यांनी डॉ. राजेश पाटील यांना फैलावर घेत त्यांना चालते व्हा असे सांगितले होते. तसेच जे काही स्पष्टीकरण द्यायचेय ते चौकशी समितीसमोर द्या, असेही म्हणत आपल्यासोबतच्या आरोग्य खात्याच्या अधिकाऱ्यांना दुसरा सीएमओ नियुक्त करा, यांचे आजचे आज निलंबन करा असे आदेश दिले होते. 

यावरून अखिल भारतीय वैद्यकीय महासंघाने नाराजी व्यक्त केली होती. तसेच संपाचा इशारा दिला होता. मंत्र्यांनी डॉक्टरांना ज्या प्रकारे वागणून दिली ती अत्यंत चुकीची आहे. आरोग्यमंत्री विश्वजीत राणे यांनी संबंधित डॉक्टरची माफी मागावी, अन्यथा संपाचा इशारा महासंघाने दिला आहे. या प्रकरणात पारदर्शी चौकशी व्हावी तसेच इस्पितळाच्या आपत्कालीन विभागात बिगर वैद्यकीय व्यक्तींच्या प्रवेशास मज्जाव करण्याच्या मार्गदर्शक तत्त्वांचे पालन करावे, अशी मागणी महासंघाने केली आहे. यावरून आज मुख्यमंत्री सावंत यांनी या प्रकरणात लक्ष घातले असून आज पाटील यांचे निलंबन रद्द केले आहे. 

राणे यांच्यावर टीका झाली तेव्हा त्यांनी मी एका ज्येष्ठ महिलेची बाजू घेतली. तिला योग्य वागणूक न मिळाल्याने मी संतापलो, मी ज्या पद्धतीने सीनियर डॉक्टरशी संवाद साधला, त्याबाबतची जबाबदारी मी घेतो व पुन्हा अशा पद्धतीची पुनरावृत्ती होणार नाही, अशी हमी देतो असे मंत्री राणे यांनी स्पष्टीकरणात म्हटले आहे. परंतू मी माफी मागणार नाही, असेही राणे म्हणाले.