बाणावली जिल्हा पंचायत तसेच विविध पंचायतींच्या १० प्रभागांसाठी २३ जून रोजी पोटनिवडणूक

मतमोजणी २४ जून रोजी होईल असे राज्य निवडणूक आयोगाने जाहीर केले आहे.

पूजा नाईक प्रभूगावकर, पणजी: दक्षिण गाेवा जिल्हा पंचायतीच्या बाणावली मतदारसंघ तसेच विविध पंचायतींच्या १० प्रभागांसाठी २३ जून रोजी पोट निवडणूक होईल. तर मतमोजणी २४ जून रोजी होईल असे राज्य निवडणूक आयोगाने जाहीर केले आहे.

दक्षिण गाेवा जिल्हा पंचायतीच्या बाणावली मतदारसंघासह फोंडा तालुक्यातील कुंडई पंचायतीचा प्रभाग ७, वळवई पंचायतीचा प्रभाग २, केरी पंचायतीचा प्रभाग ३ व बोरी पंचायतीचा प्रभाग ११. सासष्टी तालुक्यातील राशोल पंचायतीचा प्रभाग ५, सेर्रावली पंचायतीचा प्रभाग २,असोळणा पंचायतीचा प्रभाग १, डिचोली तालुक्यातील कुडणे पंचायतीचा प्रभाग २, केपे तालुक्यातील शेल्डे पंचायतीचा प्रभाग २ व बार्देश तालुक्यातील सुकुर पंचायतीचा प्रभाग १० यांच्या रिक्त पदांसाठी ही पोटनिवडणूक होईल.

या पोटनिवडणूकांसाठी ५ ते १२ जून दरम्यान सकाळी १० ते दुपारी १ या काळात उमेदवारी अर्ज स्विकारले जातील. गुरुवार १३ जून राेजी उमेदवारी अर्जांची छाननी, शुक्रवार १४ जून रोजी सकाळी १० ते दुपारी २ वाजे दरम्यान उमेदवारी अर्ज मागे घेण्याचा दिवस, रविवार २३ जून रोजी सकाळी ८ ते संध्याकाळी ५ वाजे दरम्यान मतदान व सोमवार २४ जून रोजी सकाळी ८ वाजल्यापासून मतमोजणी सुरु होईल.