लोकमत न्यूज नेटवर्क, पणजी: उत्तर गोवा लोकसभा मतदारसंघात भाजपच्या तिकिटावर सलग सहाव्यांदा श्रीपाद नाईक हे निवडणूक लढवत असून यावेळी पक्षासमोर मते वाढवण्याचे आव्हान आहे तर काँग्रेसचे उमेदवार रमाकांत खलप यांच्यासाठी ही राजकीय अस्तित्वाची लढाई ठरणार आहे.
२५ वर्षांपूर्वी १९९९ साली खलप विरुध्द श्रीपाद अशी लढत झाली होती. त्यावेळी खलप यांना पराभव पत्करावा लागला होता. श्रीपाद नाईक यांना त्यावेळी १,०४,९५८ तर खलप यांना काँग्रेसच्या तिकिटावर ६८,२३७ मते मिळाली होती. विशेष म्हणजे त्याआधीच्या १९९६ च्या निवडणुकीत मगोपच्या तिकिटावर विजयी झालेले खलप केंद्रात कायदामंत्री असतानाही १९९९ ची निवडणूक काँग्रेसच्या तिकिटावर जिंकू शकले नाहीत.
श्रीपाद हे सहाव्यांदा लोकसभेची निवडणूक लढवत असून उत्तरेत प्रस्थापितविरोधी लाट आहे का? आणि असलीच तर त्याचा फायदा उठवण्यात खलप यांना यश येईल का? असे प्रश्न उपस्थित होत आहेत. दुसरीकडे भाजपाची मते वाढवण्यासाठी उत्तरेतील पाच फुटीर काँग्रेस आमदार, जे सप्टेंबर २०२२ साली भाजपात प्रवेशकर्ते झाले त्यांची कसोटी लागणार आहे. कुंभारजुवेचे आमदार राजेश फळदेसाई, सांताक्रुझचे आमदार रुडॉल्फ फर्नांडिस यांच्यासाठी ही निवडणूक जरा जास्तच परीक्षेची ठरणार आहे. फुटिरांपैकी आमदार मायकल लोबो २०१९ च्या लोकसभा निवडणुकीवेळी भाजपसोबत होते.
२०२२ मध्ये विधानसभा निवडणुकीचा साताठ महिन्यांचा काळ सोडल्यास ते भाजपमध्येच होते. शिवोलीच्या आमदार डिलायला लोबो याही पूर्वी पतीसोबत भाजपसाठीच काम करायच्या. साळगांवचे आमदार केदार नाईक हेही २०२२ च्या विधानसभा निवडणूक काळापुरतेच तिकिटासाठी काँग्रेसमध्ये गेले व निवडून येऊन पुन्हा भाजपात परतले. २०१९ साली त्यांनी भाजप उमेदवार श्रीपाद नाईक यांच्यासाठीच काम केले होते.
लोबो हे २०१९ च्या लोकसभा निवडणुकीत श्रीपाद नाईक यांना समाधानकारक मते मिळवून देऊ शकले नव्हते. त्यांच्या कळंगुट मतदारसंघात त्यावेळी काँग्रेस उमेदवार गिरीश चोडणकर यांना जास्त मते मिळाली होती. पर्यटनमंत्री रोहन खंवटे यांनी मात्र बार्देस तालुका पिंजून काढला आहे. मांद्रे मतदारसंघात मगोपचे आमदार जीत आरोलकर व भाजपचे माजी आमदार दयानंद सोपटे अशी दुहेरी साथ श्रीपाद यांना लाभली आहे. आमदार प्रवीण आर्लेकर प्रत्यक्ष फिरताना दिसत आहेत.
सर्वाधिक ३३ आमदार भाजपकडे आहेत. सत्तरी तालुक्यात लोकसभेसाठी भाजप उमेदवाराला जास्त मते मिळतात त्यामुळे श्रीपाद नाईक यांची यावेळी ही सत्तरीवर भिस्त आहे. भंडारी समाज कोणती भूमिका घेणार हे महत्त्वाचे ठरणार आहे. श्रीपाद नाईक हे भंडारी समाजाचे असले तरी प्रस्थापितांविरोधी भावना आहे का, असाही प्रश्न उपस्थित होतो. काँग्रेसने खलप यांच्या रुपाने मराठा समाजाचा उमेदवार दिला आहे. दरम्यान, आरजीचे प्रमुख मनोज परब हेही आपले नशीब आजमावात आहेत.
२०१९ च्या गेल्या लोकसभा निवडणुकीत भाजपचे उमदेवार श्रीपाद नाईक यांना २ लाख ४४ हजार ८४४ मते मिळाली होती. त्यांच्या मतांची टक्केवारी ५७.१२ टक्के होती. प्रतिस्पर्धी काँग्रेसचे गिरीश चोडणकर यांना १ लाख ६४ हजार ५८७ मते मिळाली. हे प्रमाण ३८.४० टक्के होते. त्याआधी २०१४ च्या निवडणुकीत श्रीपाद यांना २ लाख ३७ हजार ९०३ मते मिळाली. हे प्रमाण, ५८.५१ टक्के होते. तर प्रतिस्पर्धी काँग्रेसचे रवी नाईक यांना १ लाख ३२ हजार ३०४ मते मिळाली. हे प्रमाण ३२.५४ टक्के होते.
२०१४ च्या लोकसभा निवडणुकीत उत्तर गोवा लोकसभा मतदारसंघात भाजपने १९ विधानसभा जागांवर आघाडी कायम ठेवली होती. लोबोंचा कळंगुट मतदारसंघ हा एकमेव अपवाद होता. नाईक यांनी उत्तर गोव्याची जागा एक लाखांहून अधिक मतांनी जिंकली. उत्तर गोव्यात भाजपच्या मतांचा वाटा १९९९ मधील ५४.९६ टक्के मतांवरून २०१४ मध्ये ५८.५१ टक्के इतका वाढला. काँग्रेसला २०१४ मध्ये सुमारे ३३ टक्के मते मिळाली. २००९ च्या लोकसभा निवडणकीत काँग्रेससोबत लोकस- भेसाठी राष्ट्रवादी काँग्रेस पक्ष युतीत होता. तरीही श्रीपाद नाईक यांनी जवळपास ६,३०० मतांच्या फरकाने विजय मिळवला.