कला अकादमीची स्थिती दिवसेंदिवस होतेय दयनीय

कला राखण मांडची सांबाखावर धडक : संरचनात्मक ऑडिटची मागणी

लोकमत न्यूज नेटवर्क, पणजी : कला अकादमीची स्थिती दिवसेंदिवस दयनीय होत चालली आहे. यावर कुणाचेही नियंत्रण राहिलेले नाही, असा प्रश्न उपस्थित करत काल, शुक्रवारी कला राखण मांड संघटनेच्या पदाधिकाऱ्यांनी सार्वजनिक बांधकाम खात्याच्या कार्यालयावर धडक दिली. यावेळी मुख्य अभियंता उत्तर पार्सेकर यांची भेट घेऊन अकादमीच्या स्थितीवरुन त्यांना घेरले. यावेळी अकादमीच्या कामाचे संरचनात्मक ऑडिट करण्याची मागणी केल्याची माहिती कला राखण मांडचे प्रमुख देविदास आमोणकर यांनी दिली.

यावेळी त्यांच्यासोबत टास्क फोर्सचे फ्रान्सिस कुएल्हो, कलाकार राजदीप नाईक, सीसील रॉड्रिग्ज व इतर मान्यवर उपस्थित होते. कला अकादमीच्या छताला गळती लागली आहे. ब्लॅक बॉक्स नीट वापरात नाही, आर्ट गॅलरीमध्ये योग्य प्रकाश योजना नाही, वातानुकुलीत यंत्रणेचा बोजवारा उडाला आहे.

संगीत वर्ग साऊंड प्रुफ हवे होते ते साऊंड प्रुफ नाहीत. यातून कलाकारांना व प्रेक्षकांना खूप त्रास सहन करावा लागतो. जेव्हा या गोष्टी पार्सेकर यांच्यापुढे मांडल्या तर त्यांना याबाबतचे काहीच माहिती नसल्याचे समजले. खुल्या रंगमंचबाबत उपाययोजना सुरू असल्याचे पार्सेकर म्हणले.

वेळकाढू धोरण

टास्क फोर्स तयार केल्यापासून आम्ही कला अकादमीचे संरचनात्मक ऑडिट करण्याची मागणी करत आहोत. पण जेव्हा खात्याला याबाबत विचारले असता त्यांनी सांगितले की, आम्ही आयआयटी मद्रास यांना ऑडिट करण्यासाठी निमंत्रित केले आहे, पण त्यांचा प्रतिसाद मिळालेला नाही. जेव्हा याबाबतचे मेल मागितल्यास लक्षात आले मार्चमध्ये आयआयटी मद्रासला कळविण्यात आले आहे. आम्ही आता हा पाठपुरवठा करणार आहोत, जेणेकरून ही समस्या लवकर सुटू शकेल, असे कुएल्हो यांनी सांगितले.