तब्बल ५०७ फसव्या वेबसाइट, तर ७६७ मोबाइल क्रमांक ब्लॉक; लोकांना सतर्कतेचा इशारा

गोवा पोलिसांची मोठी कारवाई : ६६० वेबसाइटच्या विरोधात तक्रारी

लोकमत न्यूज नेटवर्क, पणजी: राज्यातील वाढत्या सायबर फसवणुकांवर कठोर कारवाई करत गोवापोलिसांच्यासायबर क्राइमपोलिस ठाण्याने वर्ष २०२५ मध्ये मोठी मोहीम राबवली आहे. लोकांना गंडविण्यासाठी सुरू करण्यात आलेल्या सायबर गुन्हेगारी संबंधित ५०७ फसव्या वेबसाइट आणि ७६७ मोबाइल क्रमांक ब्लॉक करण्यात आले आहेत.

यावर्षी एकूण ६६० वेबसाइटच्या विरोधात तक्रारी आल्या होत्या. चौकशीनंतर त्यातील ५०७ बनावट किंवा फसव्या वेबसाइट्स असल्याचे आढळून आले. त्यामुळे त्या ब्लॉक करण्यात आल्या आहेत.

१५१ सोशल मीडिया अकाउंट्स आणि २ संशयास्पद मोबाइल अॅप्सही ब्लॉक करण्यात आली असल्याची माहिती सायबर विभागाचे अधीक्षक राहुल गुप्ता यांनी दिली; तसेच दूरसंचार कंपन्यांच्या सहकार्याने ७६७फसवणुकीसाठी वापरण्यात येणारे मोबाइल नंबर ब्लॉक करण्यात आल्याचे त्यांनी सांगितले.

नागरिकांना आवाहन

गोवा पोलिस डिजिटल सुरक्षिततेसाठी कटिबद्ध असून नागरिक, पर्यटक आणि व्यवसाय क्षेत्रासाठी सुरक्षित ऑनलाइन वातावरण निर्माण करण्यासाठी तत्पर असल्याचे पोलिस अधीक्षक राहुल गुप्ता यांनी सांगितले. नागरिकांनी संशयास्पद वेबसाइट्स, संदेश किंवा फोन नंबर तत्काळ चक्षु पोर्टल किंवा सायबर क्राइम प्लॅटफॉर्मवर कळवावेत आणि आर्थिक पाटला फसवणूक झाल्यास १९३० वर कॉल करून मदत घ्यावी, असे आवाहनही करण्यात आले आहे.

मे महिना सर्वाधिक गंभीर

फसवणुकीच्या या प्लॅटफॉर्ममध्ये बनावट पार्सल डिलिव्हरी संदेशांद्वारे पैसे उकळणे, ऑनलाइन गुंतवणूक फसवणूक, सेक्सटॉर्शन, डेटिंग अॅपद्वारे खंडणी, पोलिस किंवा कस्टम्सचा आव आणून केले जाणारे डिजिटल अरेस्ट स्कॅम आणि पर्यटकांना लक्ष्य करणाऱ्या खोट्या हॉटेल बुकिंग वेबसाइट्सचा मोठ्या प्रमाणावर समावेश होता.

मे २०२५ हा महिना सर्वाधिक गंभीर २ ठरला असून या महिन्यात तब्बल २५८ वेबसाइट्स ब्लॉक करण्यात आल्या होत्या. जानेवारीत ७८ आणि जून महिन्यात ७२ वेबसाइट्सवर कारवाई झाली. त्यामुळे या वर्षातील ही सायबर गुन्ह्यांसंबधी सर्वात मोठी कारवाई आहे.