वास्को - दक्षिण गोव्यातील साकवाळ महामार्गावर रविवारी सायंकाळी दुचाकी आणि खासगी मिनी बस यांच्यात अपघात झाला. या अपघातात दोन युवकांचा जागीच मृत्यू झाला. अपघातात मरण पोचलेले दोन्ही युवक मुरगाव मतदारसंघातील सडा भागातील रहिवासी असून एकाचे नाव अखिलेश गावस (वय १८) तर दुसऱ्याचे नाव गौतम केळूसकर (वय १९) असे आहे.
तसेच, यावेळी संबंधित दुचाकी, महामार्गाच्या बाजूने जात असलेल्या पारूल नाईक यांनाही धडकली. यामुळे त्याही जखमी झाल्या आहेत. त्यांच्यावर गोमॅकॉ रुग्णालयात उपचार सुरू आहेत, अशी माहिती पोलीस उपअधीक्षक सलीम शेख यांनी दिली.
पोलीस उपअधीक्षक सलीम शेख यांनी दिलेल्या माहीतीनुसार रविवारी संध्याकाळी ६.४५ च्या सुमारास हा अपघात घडला. सडा येथे राहणारे अखिलेश गावस आणि गौतम केळुसकर हे दाबोळी विमानतळ परिसर येथून वेर्णा भागात जात होते. यावेळी, बिट्स पिलानी बाहेरील साकवाळ महामार्गावर एक खासगी मिनी बस वळत असतानाच ही भरदाव वेगात असलेली दुचाकी बसला धडकली. मात्र, दुचाकी कोण चालवत होते, हे अत्याप समजू शकलेले नाही.
या अपघातात दुचाकीवरील एका तरुणाचा बस चालकाच्या दुसऱ्या बाजूला असलेल्या बस दरवाजावर आदळून जागीच मृत्यू झाला. तर दुसऱ्या तरुणाचा रुग्णालयात नेण्याच्या प्रयत्नात असतानाच मृत्यू झाला, अशी माहीती पोलीस उपअधीक्षक सलीम शेख यांनी दिली. वेर्णा पोलीस अपघाताचा अधिक तपास करत आहेत.