राज्यात ६३५ नोंदणीकृत स्टार्टअप्स: मुख्यमंत्री प्रमोद सावंत;  ३.९ कोटी रुपयांचे अनुदान वितरित

उपक्रमांबाबत वाटचाल उल्लेखनीय

लोकमत न्यूज नेटवर्क, पणजी : राज्यात सध्या ६३५ डीपीआयआयटी नोंदणीकृत स्टार्टअप्स आहेत, ज्यापैकी १४७ लाभार्थ्यांना ३.९ कोटींचे अनुदान आधीच वितरित केले आहे. स्टार्टअपच्या वाढीसाठी आवश्यक असलेल्या मार्गदर्शन, बाजारपेठ प्रवेश आणि गती प्रदान करण्यावर आम्ही लक्ष केंद्रित केले आहे. त्यामुळे आमचे राज्य स्टार्टअपमध्ये अग्रेसर आहे, असे प्रतिपादन मुख्यमंत्री डॉ. प्रमोद सावंत यांनी केले.

बांबोळी येथील एका हॉटेलमध्ये पार पडलेल्या गोवा मार्केट अॅक्सेस एक्स्पो २०२५मध्ये प्रमुख पाहुणे या नात्याने मुख्यमंत्री सावंत उपस्थित होते. यावेळी मंत्री रोहन खंवटे, मुख्य सचिव डॉ. व्ही. कांडावेलू, डीआयटीई अंड सीचे संचालक कबीर शिरगावकर, इन्फोटेक कॉर्पोरेशनचे व्यवस्थापकीय संचालक प्रवीण वळवटकर, सीईओ डी. एस. प्रशांत यांची उपस्थिती होती.

नावीन्याची रूजवण : मंत्री रोहन खंवटे

मंत्री रोहन खंवटे यांनी सांगितले की, आमचे उद्दिष्ट राज्याला भारताची सर्जनशील राजधानी म्हणून स्थान देणे आहे. हे एक्स्पो येथे प्रतिभा आणि नावीन्याची रूजवण घालणारे एक चांगले व्यासपीठ ठरले आहे. गोवा केवळ स्टार्टअप्सना आकर्षित करीत नाही, तर त्यांना उद्देशाने उभारणी करण्यासाठी एक व्यासपीठ देत आहे. यापूर्वीदेखील आम्ही असे अनेक उपक्रम राबविले आहेत.

आत्मनिर्भरतेच्या दिशेने पाऊल

राज्याच्या धोरणांना स्टार्टअप इंडिया आणि डिजिटल इंडिया सारख्या राष्ट्रीय मोहिमांशी जुळवून घेण्यासाठी आम्ही प्रयत्न करत आहोत. आमचे प्रयत्न केवळ राज्याच्या विकासासाठीच नाही, तर आत्मनिर्भर भारतालाही हातभार लावण्यासाठी आहेत. यासाठी, आम्ही एक जागतिक क्षमता केंद्र स्थापन करीत आहोत, जे आयटी कंपन्या, स्टार्टअप्स आणि उदयोन्मुख उद्योगांना वाढण्यासाठी आणि यशस्वी करण्यासाठी आवश्यक असलेल्या पायाभूत सुविधा, समर्थन आणि व्यवसाय करण्याची सोय प्रदान करेल, असे मुख्यमंत्री सावंत यांनी पुढे सांगितले.