गोदाम फुल्ल, धान खरेदी बंद

फाेटाे ....

वैरागड : मार्केटिंग फेडरेशनअंतर्गत वैरागड येथे आधारभूत धान खरेदी केंद्र शेतकऱ्यांच्या साेयीसाठी सुरू करण्यात आले. या केंद्रावर ८५० शेतकऱ्यांनी नाेंदणी केली. नाेंदणी केलेल्या शेतकऱ्यांपैकी केवळ १३५ जणांकडून धानाची खरेदी करण्यात आल्यानंतर गाेदाम फुल्ल झाले. त्यामुळे आठ दिवसापासून येथील धान खरेदी केंद्र बंद आहे. सध्या या केंद्रावर ६ हजार २९७ क्विंटल धानाची खरेदी करण्यात आली आहे. परंतु केंद्र बंद असल्याने शेतकऱ्यांना वारंवार हेलपाटे मारावे लागत आहे.

वैरागड धान खरेदी केंद्रावर धान विक्री करण्यासाठी शेतकऱ्यांनी ऑनलाईन नाेंदणी करून टाेकन मिळविले हाेते. त्यापैकी २०९ सातबारावरील धानाची खरेदी करण्यात आली. उर्वरित ६४० सातबारावरील नोंदणी केलेल्या शेतकऱ्यांचे धान खरेदी करणे शिल्लक आहे. साठवणुकीअभावी धान खरेदी केंद्र बंद करण्यात आल्याने शेतकरी धान विक्रीच्या प्रतीक्षेत आहे. धान खरेदी केंद्र सुरू झाल्यानंतर महाराष्ट्र राईस मिलच्या गोदामात १७ दिवस खरेदी झाली. या गोदामात साठवणूक झाल्यानंतर सात दिवस कृषी विभागाच्या गोदामात खरेदी करण्यात आली.

येथील सेवा सहकारी संस्थेचे गोदाम ग्रामपंचायतच्या जवळ आहे. पण विक्रीसाठी येणाऱ्या ट्रॅक्टरची संख्या लक्षात घेता, अडचण होणार म्हणून या ठिकाणी अजूनपर्यंत खरेदी सुरू करण्यात आली नाही. वैरागड धान खरेदी केंद्रावर आरमोरी तालुक्यातील ठाणेगाव, वासाळा, चामोर्शी, वनखी येथील शेतकऱ्यांचे धान खरेदी केले जात असल्याने टोकन पद्धतीने नोंदणी केलेल्या शेतकऱ्यांची संख्या मोठी आहे. या केंद्रावर आतापर्यंत अधिकाधिक बाहेरगावच्या शेतकऱ्यांच्या धानाची जास्त खरेदी झाली आहे. अजूनही वैरागड येथील शेतकरी धान विक्रीच्या प्रतीक्षेत आहेत. त्यामुळे धान ठेवण्यासाठी पर्यायी गाेदामाची व्यवस्था करावी अथवा खरेदी केलेल्या धानाची उचल करावी, अशी मागणी शेतकऱ्यांनी केली आहे.

बाॅक्स ....

केंद्रावर शेतकऱ्यांचे हेलपाटे

वैरागड येथे आधारभूत खरेदी केंद्र सुरू झाल्यानंतर केवळ २४ ते २५ दिवसच धानाची खरेदी झाली. गाेदाम भरल्याच्या नावाखाली धान खरेदी बंद करण्यात आली. त्यामुळे बाहेरगावाहून येणारे शेतकरी आपला क्रमांक केव्हा लागणार, यासाठी केंद्रावर वारंवार हेलपाटे मारत आहेत. यात त्यांना बराच त्रास सहन करावा लागत आहे.