११२४ गावकारभाऱ्यांसाठी आज मतदान

२,३१,४८९ एकूण मतदार

महिला : १,१४,२३५

पुरूष : १,१७,२५४

गडचिरोली : ग्रामपंचायत निवडणुकीच्या पहिल्या टप्प्यात शुक्रवारी १७० ग्रामपंचायतींमध्ये मतदान होणार आहे. सकाळी ७.३० वाजता सुरू होणारे मतदान दुपारी ३ वाजेपर्यंत सुरू राहील. एकूण ५०९ केंद्रांपैकी १५० पेक्षा जास्त केंद्र संवेदनशील आहेत. त्यामुळे मतदानाची वेळ दुपारी ३ पर्यंतच राहणार आहे. ११२४ जागांसाठी २५७८ उमेदवार रिंगणात आहेत.

कोरची, कुरखेडा, देसाईगंज, आरमोरी, गडचिरोली व धानोरा तालुक्यातील ४९९ मतदान केंद्र आणि १० सहाय्यकारी मतदान केंद्र मिळून ५०९ मतदान केंद्रांवर ही प्रक्रिया पार पडणार आहे. या सहा तालुक्यातील १७० ग्रामपंचायतींमधील २ लाख ३१ हजार ४८९ मतदार मतदानाचा हक्क बजावणार आहेत. यामध्ये १ लाख १४ हजार २३५ महिला, तर १ लाख १७ हजार २५४ पुरूष मतदार आहेत.

या मतदान प्रक्रियेसाठी प्रशासनाकडून २६२२ कर्मचारी आणि अधिकारी नियुक्त करण्यात आले आहेत. हे सर्व कर्मचारी मतदान केंद्रांवर आवश्यक साहित्य घेऊन पोहोचले आहेत. गडचिरोली, आरमोरी आणि देसाईगंज तालुक्यात संवेदनशील नसलेल्या केंद्रांवर गुरुवारी तालुकास्थळावरून संबंधित कर्मचारी रवाना झाले.

अशी आहे निवडणूक

ग्रामपंचायत संख्या - १७०

एकूण सदस्यसंख्या- ११२४

रिंगणातील उमेदवार २५७८

एकूण मतदान केंद्र - ५०९

अधिकारी संख्या- ५२१

कर्मचारी संख्या- २१०१

------

तालुकानिहाय ग्रामपंचायती

कोरची- १४

कुरखेडा- ३९

देसाईगंज- १७

आरमोरी- २७

गडचिरोली - ४३

धानोरा- ३०

बिनविरोध गावे

कोरची- ४

कुरखेडा- १

आरमोरी- २

गडचिरोली- ४

धानोरा- २

-----

पोलीस बंदोबस्त

प्रत्येक निवडणुकीत नक्षलवाद्यांकडून आणले जाणारे अडथळे पाहता यावेळीही नक्षलवादी अडथळे आणण्याची शक्यता पाहून मोठा पोलीस बंदोबस्त लावण्यात आला आहे. जिल्हा पोलीस दलासह नक्षलविरोधी अभियानासाठी प्रशिक्षित पथके आणि राज्य व केंद्रीय राखीव पोलीस दलाच्या तुकड्याही निवडणूक बंदोबस्तात लागल्या आहेत. कोणत्याही आव्हानाला तोंड देत मतदान प्रक्रिया यशस्वी करण्याचा निश्चय पोलीस प्रशासनाने व्यक्त केला.

---

लोकशाही प्रक्रियेत निवडणूक ही अत्यंत महत्त्वाची प्रक्रिया आहे. आपला प्रतिनिधी निवडण्याची ही संधी असते. या जिल्ह्यात निवडणुकांना मतदार नेहमीच चांगला प्रतिसाद देतात. यावेळी तो आणखी चांगला राहील, असा विश्वास आहे. संबंधित गावातील प्रत्येक मतदाराने आपला मतदानाचा हक्क बजावावा.

- कल्पना नीळ

उपजिल्हा निवडणूक अधिकारी

----

संवेदनशील गावे

पहिल्या टप्प्यात ज्या ६ तालुक्यांमध्ये निवडणूक होत आहे, त्यापैकी कोरची, कुरखेडा, धानोरा या तालुक्यांमधील गावे नक्षलदृष्ट्या संवेदनशील आहेत. त्या गावांमधील मतदान केंद्रांवर पोहोचण्यासाठी बुधवारीच संबंधित कर्मचाऱ्यांना हेलिकॉप्टरने बेस कॅम्पवर नेऊन सोडण्यात आले. १५०पेक्षा जास्त केंद्र संवेदनशील असून, त्या ठिकाणी मोठा पोलीस बंदोबस्त राहणार आहे.

----

कोरोनाच्या पार्श्वभूमीवर दक्षता

कोरोना रुग्णांचे प्रमाण आता बरेच कमी झाले असले तरी मतदान प्रक्रियेदरम्यान विशेष काळजी घेतली जाणार आहे. कोरोनाची बाधा मतदान केंद्रांवरील कर्मचारी आणि मतदारांना होऊ नये म्हणून मास्क, सॅनिटायझरसह विशिष्ट अंतराच्या नियमांचे पालन सर्वांना करावे लागणार आहे. याशिवाय मतदान केंद्रांवर कर्मचाऱ्यांना रवाना करण्यापूर्वी सर्वांची रॅपिड अँटिजेन कोरोना चाचणीही केली जात असल्याचे चित्र गुरुवारी सर्व तालुकास्थळी दिसत होते.

-----

२२ ला निकाल लागणार

पहिल्या आणि दुसऱ्या टप्प्यातील मतदान आटोपल्यानंतर दिनांक २२ला दोन्ही टप्प्यातील मतदानाची सर्व तालुकास्थळी मोजणी होऊन निकाल जाहीर केला जाणार आहे. तोपर्यंत सर्वांना प्रतीक्षा करावी लागेल.