काेराेनाविरुद्ध लढणाऱ्या ७५ याेद्ध्यांनी घेतली लस

कोरची : गडचिरोली जिल्ह्यातील पहिल्या टप्प्यातील आरोग्य विभागातील कर्मचाऱ्यांना कोविड लस देण्यासाठी १२ हजार लस जिल्ह्यात उपलब्ध झाल्या होत्या. टप्प्याटप्प्याने जिल्ह्यातील तालुक्यांमध्ये ही लस देण्यास सुरुवातही झाली होती. मात्र कोरची तालुक्यातील कोरोना काळातील आरोग्य योद्ध्यांना ही लस केव्हा देणार याची प्रतीक्षा होती. गडचिरोली जिल्ह्यातील गडचिरोली चामोर्शी अहेरी आरमोरी व वडसा धानोरा कुरखेडा या तालुक्यांत टप्प्याटप्प्याने लस वितरण करून लस देण्यास सुरुवात झाली होती. १ फेब्रुवारीपासून ग्रामीण रुग्णालय कोरची येथेही कोविड लस देण्यास सुरुवात झालेली आहे.

कोविड लस ठेवण्यासाठी नवीन शीतसाखळी उपकरण कोरची ग्रामीण रुग्णालयात ठेवण्यासाठी पाठविण्यात आलेले होते; मात्र काही कारणास्तव ग्रामीण रुग्णालयातील कर्मचाऱ्यांनी ते शीतसाखळी उपकरण जिल्ह्यात परत पाठवले होते. याबाबत ‘लोकमत’ने २९ जानेवारीला बातमी प्रकाशित केली. या वृत्ताची दखल घेत जिल्ह्यातील वरिष्ठ अधिकाऱ्यांनी तत्काळ याबाबतची सुविधा करून ग्रामीण रुग्णालयात तीन दिवसांत लस देण्याची सुविधा करून १ फेब्रुवारीपासून ही कोविड लस देण्यास सुरुवात केलेली आहे. ही कोरोनाची लस आरोग्य तालुक्यात कोरोना योद्धा म्हणून कार्य केलेल्यांना टप्प्याटप्प्याने देण्यात येणार असल्याची माहिती आरोग्य विभागाकडून देण्यात आली. कोरची ग्रामीण रुग्णालयात ही लस १ फेब्रुवारीपासून लावण्यास सुरुवात झाली असून, पहिल्याच दिवशी ७५ कोरोना योद्ध्यांनी ही लस लावून घेतली आहे. ही लस प्रत्येक दिवशी शंभर कोरोना योद्ध्यांना लावण्यात येणार असून, प्रथम टप्प्यात ग्रामीण रुग्णालय व प्राथमिक आरोग्य केंद्रातील संपूर्ण कर्मचाऱ्यांना ही लस देण्यात येणार आहे. प्रथम टप्प्यात देण्यात येणारे आरोग्य कर्मचारी हे ५८० च्या वर असून, ही लस मोहीम प्रथम टप्प्यात सहा दिवस चालणार आहे. रविवारी व मंगळवारी लस मोहीम बंद असल्याची माहिती मिळाली आहे. १ फेब्रुवारीपासून ही लस लावण्यास सुरुवात झाली असून, ही लस कोरची ग्रामीण रुग्णालयातील वैद्यकीय अधिकारी डॉ. राहुल राऊत यांच्यापासून देण्यास सुरुवात झाली.

या वेळी तहसीलदार छगनलाल भंडारी, तालुका काँग्रेस अध्यक्ष श्यामलाल मडावी, वैद्यकीय अधीक्षक डॉ. बागराज धुर्वे, डॉ. आशिष इटनकर, नंदकिशोर वैरागडे, शालीकराम कराडे, आशिष अग्रवाल व आरोग्य विभागाचे कर्मचारी उपस्थित होते. पहिला टप्पा आटोपल्यानंतर नगरपंचायतचे कर्मचारी, पोलीस विभागातील कर्मचारी, महसूल विभागातील कर्मचारी यांना ही लस देण्यात येणार असल्याची माहिती आरोग्य विभागाकडून देण्यात आली. लस देण्याकरिता नाव नोंदणी मोहीम ऑनलाइन पद्धतीने संपूर्ण देशभर राबविली जात आहे. कोरची तालुक्यातील एकमेव बीएसएनएल इंटरनेट सेवा असल्याने ती कासवगतीने सुरू आहे. या बीएसएनएलच्या इंटरनेटमुळे तालुक्यातील ऑनलाइन प्रक्रिया राबविण्यात अनेक अडचणी येत असल्याचेही दिसून येत आहे.

बाॅक्स

लस पूर्णत: सुरक्षित

लस लावण्याची मोहीम कोरची तालुक्यात सुरू करण्यात आली असून, ही लस पूर्णपणे सुरक्षित आहे. त्यामुळे आरोग्य विभागाच्या प्रत्येक कर्मचाऱ्याने आपले नाव नोंदवून ही लस घ्यावी, असे आवाहन वैद्यकीय अधीक्षक डॉ. बागराज धुर्वे यांनी केले आहे.