४३७ सदस्यांची अविरोध निवड, १,०४१ जागांसाठी २,५७७ रिंगणात

२६ ग्रामपंचायतींमध्ये अविरोध निवड

देसाईगंज वगळता सर्वच तालुक्यात काही ग्रामपंचायती अविरोध निवडल्या गेल्या. त्यातील काही ग्रामपंचायतींमध्ये काही जागांसाठी एकही अर्ज आला नसल्यामुळे त्या रिक्त राहिल्या, पण ज्या जागांसाठी अर्ज त्या ठिकाणी एक-एकच अर्ज शिल्लक असल्याने त्या ग्रामपंचायतींमध्ये आता निवडणूक होणार नाही. अशा ग्रामपंचायतींमध्ये गडचिरोली तालुक्यात ४, धानोरा तालुक्यात १२, आरमोरी २, कुरखेडा ४ आणि कोरची तालुक्यात ४ ग्रामपंचायती आहेत.

आमदारांना द्यावा लागणार कोटीचा निधी

पहिल्या टप्प्यातील ६ तालुके गडचिरोली आणि आरमोरी विधानसभा क्षेत्रातील आहेत. अविरोध निवड होणाऱ्या ग्रामपंचायतींना प्रत्येकी २५ लाखांचा विकास निधी देण्याचे आ. कृष्णा गजबे यांनी तर १५ लाखांचा निधी देण्याचे आ. डॉ. देवराव होळी यांनी जाहीर केले होते. आ. गजबे यांच्या क्षेत्रातील १० ग्रामपंचायती अविरोध तर आ. होळी यांच्या क्षेत्रातील ६ ग्रामपंचायती पूर्णपणे अविरोध निवडल्या गेल्या आहेत. आता त्यांना हा निधी आमदारांच्या स्थानिक विकास निधीतून मिळेल.

८७ जागा राहणार रिक्त

एकही नामांकन न आल्यामुळे किंवा जे आले ते पुरेपूर नसल्यामुळे वैध ठरले नसल्यामुळे सहा तालुक्यात ग्रामपंचायत सदस्यांच्या ८७ जागा रिक्त राहणार आहेत. त्यात सर्वाधिक ४९ जागा धानोरा तालुक्यातील आहेत. याशिवाय गडचिरोली ९, आरमोरी २, कुरखेडा १५ आणि कोरची तालुक्यातील १२ जागांचा समावेश आहे. राखीव जागांसाठी जात प्रमाणपत्रासह इतर सर्व कागदपत्रांची पूर्तता करणारे योग्य उमेदवार मिळाले नसल्यामुळे त्या जागा रिक्त राहिल्या. त्या ठिकाणी राज्य निवडणूक आयोगाच्या निर्देशानुसार पुढे पोटनिवडणूक होईल.