जिल्ह्याला वादळ, अवकाळी पावसाचा तडाखा

गडचिराेली : शनिवारी दिवसभर कडाक्याचे ऊन हाेते. त्यामुळे सायंकाळी पाऊस येईल अशी अपेक्षा नसताना रात्री आठ वाजता वातावरणात अचानक बदल झाला. साेसाट्याच्या वाऱ्यासह पावसाला सुरुवात झाली. गडचिराेली तालुक्यालाही अवकाळी पावसाने झाेडपून काढले. वादळामुळे अनेकांच्या घरांवरील छत उडून गेले. गडचिराेली शहरासह ग्रामीण भागाचा वीज पुरवठा खंडित झाला. अडपल्ली-गाेगाव परिसरातील वीज पुरवठा रात्रभर खंडित झाला हाेता.

मुलचेरा : तालुक्यातील मल्लेरा या गावातील ४० घरांचे वादळामुळे नुकसान झाले आहे. कोंडा बोमा गरतुलवार, दिवाकर गंगाराम कोसनवार, तुळशीराम लिंगा आरके यांच्या घरांवरील कौले व टिनाचे छत उडून गेले आहे. काही गावांमध्ये गारपीटही झाली. गारांच्या तडाख्यामुळे शेकडाे पक्षी मरण पावले.

तुळशी, काेरेगाव, चाेप : देसाईगंज तालुक्यातील विसोरा, तुळशी, कोकडी, झरी, फरी, उसेगाव, शिवराजपूर, चोप, कोरेगाव, शंकरपूर, बोळधा या गावांसह देसाईगंज तालुक्यातील इतरही गावांमधील उन्हाळी धान पिकाला गारपिटीने झोडपले. जवळपास एक तास मुसळधार पाऊस झाला. त्यामुळे खोलगट व नाल्याशेजारील जमिनीत व धान पिकात पाणी साचले. धानाचा निसवा १०० टक्के होऊन धान पीक कापणी योग्य झाले होते. दि. १ मे रोजी झालेल्या गारपीट व अवकाळी जोरदार पावसाने उभ्या धान पिकाला चांगलेच झोडपले. धान पिकाचे ५० टक्के नुकसान झाल्याने तालुक्यातील शेतकरी चिंताग्रस्त होऊन आर्थिक अडचणीत सापडला आहे. आधीच कोरोनामुळे त्रस्त झालेल्या शेतकऱ्यांना या दुसऱ्या संकटाचा सामना करावा लागत आहे. शनिवारी झालेल्या गारपिटीने धान पीकासोबतच आंब्याचे मोठे नुकसान झाले. अनेक ठिकाणी सुमारे अर्धा तास गारांचा पाऊस सुरू होता. हरभऱ्याच्या आकाराएवढ्या व त्यापेक्षाही मोठ्या गारा पडल्याने लोंबाचे धान गळून पडले.

बाॅक्स

आमदारांनी केली पाहणी

आरमाेरी विधानसभा क्षेत्राचे आमदार कृष्णा गजवे यांंनी चाेप, काेरेगावसह ज्या भागात गारपीट झाली, त्या गावातील शेतांना भेटी दिल्या. धान पिकाची पाहणी केली. नुकसान झालेल्या बाधित पिकांचे तत्काळ पंचनामे करण्याच्या सूचना आमदार गजबे यांनी महसूल व कृषी विभागाच्या अधिकाऱ्यांना केल्या.