मतदार यादी प्रमाणिकरण मोहिमेला मिळणार गती

राज्य निवडणूक आयोगाच्या निर्देशानुसार मतदार यादी प्रमाणिकरण व शुध्दीकरण कार्यक्रमासाठी १४ जून रोजी विशेष मोहीम आयोजित करण्यात आली आहे.

चामोर्शी : राज्य निवडणूक आयोगाच्या निर्देशानुसार मतदार यादी प्रमाणिकरण व शुध्दीकरण कार्यक्रमासाठी १४ जून रोजी विशेष मोहीम आयोजित करण्यात आली आहे. या संदर्भात चामोर्शीचे उपविभागीय अधिकारी तळपाडे यांच्या अध्यक्षतेखाली सभा घेण्यात आली.
चामोर्शी तालुक्यातील सर्व मतदान केंद्रस्तरीय अधिकारी यांची सभा घेऊन मतदार यादीत समाविष्ट असलेले सर्व मतदारांचे आधार कार्ड, मोबाईल क्रमांक, ई-मेल आयडी लिंक करण्याकरिता माहिती गोळा करण्याचे निर्देश देण्यात आले. परंतु सदर कामामध्ये प्रगती नसल्याने सर्व पर्यवेक्षकांची सभा आयोजित करून या संदर्भात आढावा घेण्यात आला. सर्व पर्यवेक्षकांना आधार कार्ड गोळा करण्याबाबत अहवाल दररोज सादर करणे व ९० टक्के काम १० जून पर्यंत पूर्ण करण्याच्या सूचना देण्यात आल्या. तसेच तालुक्यातील १८ वर्ष पूर्ण झालेला एकही मतदार नोंदणीशिवाय राहणार नाही, या दृष्टीने त्यांचे नाव समाविष्ट करण्याबाबत निर्देश देण्यात आले.
तसेच नाव दुरूस्ती, दुबार व मयत मतदारांची नावे वगळणे, १०० टक्के मतदारांचे फोटो गोळा करणे या कामावर लक्ष देण्याबाबतही निर्देश बैठकीत देण्यात आले. १४ जून रोजी विशेष मोहिमेमध्ये मतदार केंद्रांना भेटी देऊन गैरहजर असलेल्या व कामात निष्काळजीपणा करणाऱ्या कर्मचाऱ्यावर कारवाई करण्याबाबत प्रस्ताव सादर करण्याचे निर्देश देण्यात आले आहे. (शहर प्रतिनिधी)