बैलबंडी व कारसह सहा लाख सात हजारांची दारू जप्त

सिरोंचा तालुक्यातील आसरअल्ली येथे तीन लाख सात हजारांची दारू बैलबंडीतून आणताना तर देसाईगंज तालुक्यात ...

आसरअल्ली व एकलपुरात कारवाई : आसरअल्लीत दारू गाळण्याच्या साहित्याची विक्री वाढली
गडचिरोली : सिरोंचा तालुक्यातील आसरअल्ली येथे तीन लाख सात हजारांची दारू बैलबंडीतून आणताना तर देसाईगंज तालुक्यात एकलपूरजवळ कारमधून गोंदिया जिल्ह्यात कारसह तीन लाखांची दारू आणताना पोलिसांनी पकडली.
तेलंगणा व महाराष्ट्र सीमेजवळ सिरोंचा तालुक्यात असलेल्या आसरअल्ली पोलीस ठाण्यांतर्गत येणाऱ्या मोटला टेकडा येथे बैलबंडीतून अवैधरित्या दारू आणत असताना तीन आरोपींना अटक करण्यात आली. त्यांच्याकडून ३ लाख ७ हजार रूपयांचा माल जप्त करण्यात आला.
मोटला टेकडा येथून आसरअल्लीकडे बैलबंडीने दारू आणत असताना हिरामल्लू बोतय्या भिमकरी, चंद्रम अर्जना चौधरी, अंकलू बापू दाते, रा. सर्व आसरअल्ली यांना ताब्यात घेण्यात आले. तर चौथा इसम गणेश चंद्रय्या पाले हा अंधाराचा फायदा घेऊन पसार झाला. या तीन आरोपींना अटक करून बैलबंड्या व विदेशी दारू ३ लाख ७ हजार रूपयांचा माल जप्त करण्यात आला. सदर कारवाई उपविभागीय पोलीस अधिकारी पवार व ठाणेदार खाटपे यांच्या मार्गदर्शनात पोलीस उपनिरिक्षक नागराज बिराजदार, पोलीस हवालदार दिलीप इनमुलवार, पोलीस शिपाई हेमंत राऊत, शुक्राचार्य गवळी यांनी पार पाडली. आसरअल्ली परिसरात गुळाची तस्करी वाढलेली असून येथील काही सावकार गुळ व दारू बनविण्यासाठी वापरल्या जाणाऱ्या वस्तू अवैधरित्या पुरवठा करीत आहे.
तर दुसऱ्या एका कारवाईत येथील दारुबंदी पथकाच्या अधिकाऱ्यांनी सोमवारी सकाळी देसाईगंज तालुक्यातील एकलपूर येथे सापळा रचून गोंदिया जिल्ह्यातून येणाऱ्या दीड लाखांच्या दारुसह ३ लाख रुपये किंमतीचे चारचाकी वाहन जप्त केले. याप्रकरणी चंदर पुतुलाल जाट, सतीश विक्रम अहेरवार दोघेही रा. जबलपूर यांना अटक करण्यात आली असून, गोंदिया येथील दारु दुकानमालक व कानपूर दिलीप जाट यांच्यावर गुन्हे दाखल केले आहेत. देसाईगंज तालुक्यातील गौरनगर, अरुणनगरमार्गे गोंदिया जिल्ह्यातून गडचिरोली जिल्ह्यात अवैधरित्या दारु आणण्यात येत असल्याची माहिती मिळताच जिल्हा दारुबंदी पथकाचे सहायक पोलीस निरीक्षक विनायक कोळी यांच्या नेतृत्वातील कर्मचाऱ्यांनी सोमवारी सकाळी एकलपूर फाट्याजवळ सापळा रचला.
यावेळी समोरुन येणारी पांढऱ्या रंगाची चारचाकी कार गाडी थांबवून तिची तपासणी केली असता, त्यामध्ये टँगो पंच कंपनीची १ लाख ४२ हजारांची देशी दारु, रोख ६ हजार रुपये आढळून आले. पोलिसांनी या दारुसह ३ लाख रुपये किमतीची कार गाडी जप्त केली. याप्रकरणी वाहनातील चंदर पुतुलाल जाट व सतीश विक्रम गहेरवार यांना ताब्यात घेण्यात आले. ही दारु गोंदिया जिल्हयातील दारु दुकानाच्या मालकाकडून आणली असून, ती चंद्रपूर येथील कानपूर दिलिप जाट याच्या सांगण्यावरुन चंद्रपूरला नेण्यात येत होती, असे दोघांनी सांगितले. चारही जणांवर गुन्हे दाखल करण्यात आले. सदर कारवाई विनायक कोळी यांनी पार पाडली. (जिल्हा प्रतिनिधी)