परीक्षक, पेपरसेटर व माॅडरेटरचे मानधन प्रलंबित

गडचिराेली : स्थानिक गाेंडवाना विद्यापीठाद्वारे परीक्षेच्या कामासाठी नियुक्त केलेल्या परीक्षक, पेपरसेटर व माॅडरेटर आदींचे मानधन प्रलंबित आहे. हे मानधन लवकर अदा करण्यात यावे, अशी मागणी गाेंडवाना विद्यापीठ यंग टीचर्स असाेसिएशनने केली आहे. यासंदर्भात प्रभारी कुलसचिव व परीक्षा नियंत्रक डाॅ.अनिल चिताडे यांना निवेदन देण्यात आले.

निवेेदनात म्हटले आहे की, चंद्रपूर-गोंडवाना विद्यापीठाद्वारे होणाऱ्या विविध परीक्षांकरिता अनेक विषयातील प्राध्यापकांची परीक्षक, प्राश्नीक आणि माॅडरेटर म्हणून नियुक्त केली जाते. यामध्ये नियुक्त प्राध्यापकाच्या वतीने विविध परीक्षांसंबंधीची कार्य अत्यावश्यक सेवा म्हणून तत्परतेने केली जातात. मात्र सदर कार्याचे मानधन प्राध्यापकांना वेळेवर विद्यापीठाकडून प्राप्त होत नाही.

गोंडवाना विद्यापीठाद्वारे घेण्यात येणाऱ्या विविध परीक्षेमध्ये चंद्रपूर व गडचिरोली जिल्ह्यातील विविध विषयातील प्राध्यापकवृंद अनेक वर्षांपासून परीक्षक,पेपरसेटर आणि मॉडरेटर म्हणून कार्य करीत आहे. मात्र अनेक सत्रातील झालेल्या परीक्षेचे मानधन प्राध्यापकांना वेळेवर प्राप्त झाले नाही. यासंदर्भात डॉ. चिताडे यांनी शिष्टमंडळासमक्ष विद्यापीठाचे लेखाधिकारी आणि परीक्षा विभागाचे सहायक कुलसचिव यांच्याशी चर्चा करून सदर प्राध्यापकांचे परीक्षा कार्यासंबंधी प्रलंबित मानधन लवकर काढून देण्याचे आश्वासन दिले आहे. याप्रसंगी शिष्टमंडळात यंग टीचर असोसिएशनचे अध्यक्ष डॉ. संजय गोरे, सचिव प्रा. विवेक गोरलावार व्यवस्थापन परिषद सदस्य डॉ. योगेश्वर दुधपचारे, उपाध्यक्ष डॉ. राजू किरमिरे, उपाध्यक्ष डॉ. नंदाजी सातपुते, सहसचिव डॉ.श्रीराम गहाणे, विभाग समन्वयक प्रा. निलेश हलामी,डॉ. प्रफुल्ल बनसोड, डॉ. अभय लाकडे, प्रा. किशोर कुडे, डॉ. लक्ष्मण कांबळे, डॉ.पी.एम.राजुरवाडे, डॉ. एच.टी. गजभिये यांचा समावेश होता.