आरमोरी तालुक्यात ८५ केंद्रांवर मतदान

आरमोरी : तालुक्यातील २७ ग्रामपंचायतींमध्ये सार्वत्रिक निवडणूक घेतली जात आहे. एकूण ८५ मतदान केंद्रांवर मतदान होणार आहे. याकरिता ३७८ कर्मचाऱ्यांची नियुक्ती करण्यात आली आहे. ८५ मतदान केंद्रापैकी ३६ मतदान केंद्र हे संवेदनशील तर ४९ केंद्र सर्वसाधारण आहेत.

आरमोरी तालुक्यातील चुरमुरा, वडधा, बोरीचक, देलोडा (बुज), चामोर्शी माल, वासाळा, डोंगरगाव (भु), ठाणेगाव, कोरेगाव रांगी, भाकरोंडी, कुलकुली, वैरागड, सिर्सी, शंकरनगर, जोगीसाखरा, इंजेवारी, किटाळी, डोंगरसावंगी, देऊळगाव, शिवणी(बुज), पळसगाव, वघाळा, कासवी, सायगाव, देलनवाडी, मानापूर, पिसेवडधा आदी २७ ग्रामपंचायतींसाठी प्रत्यक्ष मतदान होणार आहे.२७ ग्रामपंचायतीच्या २१४ जागांसाठी ४९९ उमेदवार निवडणुकीत उभे आहेत. त्यामध्ये २६८ महिला उमेदवार तर २३१ पुरुष उमेदवारांचा समावेश आहे. निवडणूक होत असलेल्या ग्रामपंचायतमध्ये एकूण ४८ हजार ४१७ मतदार मतदानाचा हक्क बजावणार आहेत. त्यामध्ये २४ हजार ३०८ पुरुष तर २४ हजार १०९ महिला मतदारांचा समावेश आहे.

निवडणुकीसाठी तालुका प्रशासनाची तयारी पूर्ण झाली आहे. बुधवारपासूनच बुथ पार्ट्या केंद्रस्थळी रवाना करण्यात आल्या आहेत. निवडणुकीकरिता एकूण ३७८ कर्मचाऱ्यांची नियुक्ती करण्यात आली आहे. सकाळी ७.३० ते दुपारी ३ वाजेपर्यंत मतदानाची वेळ निश्चित करण्यात आलेली आहे. मतदान केंद्रांवर नियंत्रण ठेवण्यासाठी ७ क्षेत्रीय अधिकाऱ्यांची नियुक्ती करण्यात आली आहे. मतदान केंद्रावर ८५ केंद्र अधिकारी व २५५ मतदान अधिकारी काम करणार आहेत. तसेच मतदान केंद्रावर कोणतीही अनुचित घटना घडू नये व मतदान शांततेत पार पाडावे यासाठी माेठ्या प्रमाणात पोलीस बंदोबस्त लावण्यात आला आहे.