तीन महिन्यांपासून वेतन प्रलंबित

आश्रमशाळा कर्मचाऱ्यांचे मागील तीन महिन्यांपासून वेतन प्रलंबित असल्याने कर्मचाऱ्यांना आर्थिक अडचणींचा सामना करावा लागत आहे.

अहेरी : आश्रमशाळा कर्मचाऱ्यांचे मागील तीन महिन्यांपासून वेतन प्रलंबित असल्याने कर्मचाऱ्यांना आर्थिक अडचणींचा सामना करावा लागत आहे. त्यामुळे सदर समस्या मार्गी लावावी, अशी मागणी अनुदानित आश्रमशाळा संघटनेच्या वतीने अहेरीचे प्रकल्प अधिकारी आर. आर. सोनकवडे यांच्याकडे निवेदनातून करण्यात आली आहे.
एकाच वेळी एवढी मोठी रक्कम अदा करणे अशक्य असल्यामुळे शिक्षकांनी न्यायालयात धाव घेतली. सदर मुद्दा सध्या न्यायप्रविष्ट आहे. परंतु वेतनाविना कर्मचाऱ्याची आर्थिक अडचण लक्षात घेता, पुन्हा वेतन निश्चिती व वसुली करणे अडचणीचे व अन्यायकारक असल्याने सुधारित एकस्तर वेतन निश्चिती प्रकरण निकाली लागेपर्यंत वेतन वसुली थांबविण्यात यावी व प्रलंबित वेतन तत्काळ अदा करावे, अशी मागणी संघटनेचे विभागीय अध्यक्ष महादेव बासनकर यांनी केली.
प्रकल्प अधिकारी आर. आर. सोनकवडे यांनी मागण्या लक्षात घेऊन वेतन देयके पूर्वीप्रमाणेच सादर करण्याची मुख्याध्यापकांना आदेशित करून प्रलंबित वेतन अदा करण्याचे मान्य केले. यावेळी प्रकल्प कार्यालय भामरागड येथील सहायक प्रकल्प अधिकारी विलास राचेलवार, लेखाधिकारी वाळूजकर, संघटनेचे विलास सोमनकर, सुधाकर शेंडे व संघटनेचे पदाधिकारी उपस्थित होते. (शहर प्रतिनिधी)
कर्मचाऱ्यांवर वेतन वसुलीचे गंडांतर
आदिवासी विकास विभागांतर्गत गडचिरोली, अहेरी व भामरागड येथील शासकीय व अनुदानित आश्रमशाळेतील शिक्षकांना देय असलेल्या एकस्तर वेतनश्रेणी व गे्रड वेतनात एकसूत्रता नसल्याने कर्मचारी कमी अधिक प्रमाणात वेतनाची उचल करीत आहेत. आश्रमशाळेतील शिक्षकांना मागील दोन वर्षांपूर्वी सुधारित एकस्तर वेतनश्रेणी व गे्रड वेतन लागू करण्यात आले. त्यामुळे शिक्षकांनी जवळपास चार ते पाच लाख रूपयांचा अतिरिक्त रकमेची उचल केली. कालांतराने लागू केलेली सुधारित एकस्तर वेतनश्रेणी ही सदोष असल्याचे प्रकल्प कार्यालयाच्या निदर्शनास आले. त्या अनुषंगाने शिक्षकांनी उचल केलेल्या पूर्ण रकमेची वसुली झाल्याशिवाय व पूर्ववत एकस्तर वेतन निश्चिती केल्याशिवाय वेतन देता येणार नाही, असे प्रकल्पाच्या वतीने आदेशित करण्यात आले. त्यामुळे आश्रमशाळा कर्मचाऱ्यांवर गंडांतर आले आहे.