देसाईगंजात मोबाईल व्हॅनचा शुभारंभ

महाराष्ट्र शासन महसूल विभागाच्या वतीने विशेष सहाय्य तथा आम आदमी विमा योजनेंतर्गत फिरत्या मोबाईल व्हॅनद्वारे प्रसिद्धी ....

देसाईगंज : महाराष्ट्र शासन महसूल विभागाच्या वतीने विशेष सहाय्य तथा आम आदमी विमा योजनेंतर्गत फिरत्या मोबाईल व्हॅनद्वारे प्रसिद्धी व प्रचार कार्यक्रमाला सुरूवात करण्यात आली आहे. देसाईगंजात उपविभागीय अधिकारी डी. जी. नान्हे यांच्या हस्ते हिरवी झेंडी दाखवून सेवेचा शुभारंभ करण्यात आला.
यावेळी तहसीलदार अजय चरडे, नायब तहसीलदार ए. व्ही. मडावी, उमेश अंबादे, वाय. टी. धाईत व कर्मचारी उपस्थित होते. शासनाच्या विविध योजनांची माहिती जनतेपर्यंत पोहोचविण्याच्या दृष्टीने सदर प्रचार मोहीम सुरू करण्यात आली आहे. तालुक्यातील २० गावांमध्ये मोबाईल व्हॅन वाहन पोहोचणार असून शासनाच्या योजनांबाबत नागरिकांना मार्गदर्शन केले जाणार आहे. नागरिकांनी विविध कल्याणकारी योजनांची माहिती करून घ्यावी, तसेच योजनेच्या लाभाकरिता प्रशासनाकडे रितसर अर्ज दाखल करावे, असे आवाहन उपविभागीय अधिकारी नान्हे यांनी केले.
देसाईगंज तालुक्यातील अनेक भागात सदर वाहन जाणार असून वाहनाच्या माध्यमातून नागरिकांमध्ये योजनांबाबत जनजागृती केली जाणार आहे. (तालुका प्रतिनिधी)