दत्तक ग्राम येवलीचा विकास आराखडा मंजूर

पंतप्रधान नरेंद्र मोदी यांच्या संकल्पनेतून साकार झालेल्या सांसद आदर्श ग्राम योजनेंतर्गत येवली गावाचा ग्राम विकास .....

आदर्श सांसद ग्राम योजना : गावात विविध दाखल्यांचे वाटप होणार
गडचिरोली : पंतप्रधान नरेंद्र मोदी यांच्या संकल्पनेतून साकार झालेल्या सांसद आदर्श ग्राम योजनेंतर्गत येवली गावाचा ग्राम विकास आराखडा ८ जून रोजी खा. अशोक नेते यांच्या अध्यक्षतेखाली झालेल्या बैठकीत मंजूर करण्यात आला. यावेळी जिल्हाधिकारी रणजीतकुमार, मुख्य कार्यकारी अधिकारी संपदा मेहता प्रामुख्याने उपस्थित होते. यावेळी ग्राम विकास आराखड्यावर चर्चा करण्यात आली. जिल्हाधिकारी यांनी ग्राम विकास आराखड्यात समाविष्ट असलेली कामे प्राधान्याने पूर्ण करण्यासाठी सर्व विभाग प्रमुखांनी प्रयत्न करावे, गावात दारूबंदी, गुटखाबंदी करावी, तसेच गावातील प्रत्येक नागरिकास सातबारा व इतर आवश्यक दाखले मोफत वितरित करण्यासंदर्भात गडचिरोलीचे तहसीलदार यांना निर्देश दिले. मुख्य कार्यकारी अधिकारी यांनी सदर योजनेची खऱ्या अर्थाने या कार्यक्रमातून मुहूर्तमेढ रोवण्यात आली, असे प्रतिपादन केले.
या कार्यक्रमात बांधकाम, आरोग्य, ग्रामीण पाणीपुरवठा, पंचायत समिती, तहसील कार्यालय, पशुधन विभाग, ग्राम पंचायत, पोलीस विभाग आदींचाही आढावा घेण्यात आला. खा. अशोक नेते यांनी सांसद आदर्श ग्राम विकास योजनेचा दृष्टिकोन अतिशय चांगला आहे. ग्राम विकास आराखडा तयार करून विकासाकरिता आवश्यक भौतिक व मूलभूत सुविधांचा समावेश केल्याबद्दल त्यांनी प्रशासनाचे अभिनंदन केले. आराखड्यात समाविष्ट कामे विहीत मुदतीत करण्यासाठी प्रत्येक विभागाने दर महिन्याला अहवाल द्यावा, अशा सूचना त्यांनी केल्या.
या संपूर्ण नियोजन आराखड्याचे वाचन व संचालन उपमुख्य कार्यकारी अधिकारी फरेंद्र कुत्तीरकर यांनी केले. यावेळी गटविकास अधिकारी व्ही. यू. पचारे, तहसीलदार जाधव, सरपंच गीता विजय सोमनकर, उपसरपंच सुरेखा रुमाजी भांडेकर, बाबुराव कोहळे, विलास भांडेकर, ग्रा. पं. सदस्य व सर्व विभागाचे प्रमुख अधिकारी उपस्थित होते. (जिल्हा प्रतिनिधी)