परराज्यात उपचार घेणाऱ्या मुख्याध्यापिकेच्या मदतीला धावला माजी विद्यार्थी

विद्यार्थी आणि शिक्षकांचे नाते हे गुरू-शिष्यासारखे असते. शाळेच्या चार भिंतीत शिस्त, संस्कार आणि पाठ्यक्रमाचे धडे घेणारे अनेक विद्यार्थी शाळा, महाविद्यालय सोडल्यावरही हे नाते जपतात. याचा प्रत्यय आरमोरी येथील सारंग जांभुळे यांनी दिला. सन २०११ ते २०१६ दरम्यान ब्रह्मपुरी येथील ख्रिस्तानंद स्कूल येथे शिक्षण घेणाऱ्या सारंग जांभुळे यांच्या तत्कालीन प्राचार्य असलेल्या सिस्टर नव्या रोज मध्यप्रदेशातील होशंगाबाद येथील जोसेफ हाॅस्पिटल येथे भरती आहेत. कोरोनामुळे त्यांची प्रकृती खालावली होती. डॉक्टरांच्या सूचनेनुसार त्यांना रेमडेसिविर इंजेक्शन देणे गरजेचे होते; पण खूप प्रयत्न करूनही ते इंजेक्शन मिळत नव्हते; पण जांभुळे यांनी पूर्ण प्रयत्न केेले आणि त्यांना त्यात यश आले.

बाॅक्स

युकाॅच्या उपक्रमातून मदत इंजेक्शनअभावी मुख्याध्यापिकेचा जीव धोक्यात आला आहे, ही बाब आरमोरी विधानसभा युवक काँग्रेसचे महासचिव सारंग नरेंद्र जांभुळे या माजी विद्यार्थ्याला कळताच त्यांनी मदतीसाठी हालचाली सुरू केल्या. सोशल मीडियाच्या माध्यमातून युवक काँग्रेसतर्फे कोविडच्या काळात लोकांच्या मदतीसाठी सुरू केलेली एसओएसआयवायसी या उपक्रमाच्या माध्यमातून तेथील पदाधिकाऱ्यांचे नाव नंबर शोधून त्यांच्याशी संपर्क केला. त्यांना विनंती करून मदत उपलब्ध करून देण्याची मागणी केली. मध्यप्रदेशमधील युवक काँग्रेसचे पदाधिकारी प्रशांत पराशर यांनी दुसऱ्या दिवशी रेमडेसिविर इंजेक्शन सिस्टर नव्या रोज यांना उपलब्ध करून दिले.