रेल्वे प्रवाशांना लुबाडणारे पाच लुटारू अटकेत

रेल्वेने प्रवास करणाऱ्या प्रवाशांना शस्त्राचा धाक दाखवून त्यांच्याकडील मोबाईल व रोख रक्कम हिसकाविणाऱ्या पाच आरोपींना रेल्वे पोलिसांनी अटक केली आहे. या आरोपींना न्यायालयाने येत्या

गोंदिया : रेल्वेने प्रवास करणाऱ्या प्रवाशांना शस्त्राचा धाक दाखवून त्यांच्याकडील मोबाईल व रोख रक्कम हिसकाविणाऱ्या पाच आरोपींना रेल्वे पोलिसांनी अटक केली आहे. या आरोपींना न्यायालयाने येत्या २३ सप्टेंबरपर्यंत पोलीस कोठडी सुनावली आहे. त्यांच्याकडून लुटमारीच्या अनेक घटना उघडकीस येण्याची शक्यता वर्तविली जात आहे.
संजू मुरारी पडूरकर (रा.कुडवा), सनी हिशेब भेलावे (रा.कुंभारेनगर), गोलू उर्फ आकाश चौधरी (गोंडीटोला, कुडवा), रोहीत प्रेमलाल मेश्राम व धनराज उर्फ टिंकू राजेंद्र राऊत (रा.कुंभारेनगर) अशी आरोपींची नावे असून ते गोंदिया व आजुबाजूच्या परिसरातीलच रहिवासी आहेत.
रेल्वे पोलिसांनी दिलेल्या माहितीनुसार, फिर्यादी नरेश मदनलाल येलसरे (२५) व दुर्गेश शिवचरण प्रधान (२४, रा.मजीतपूर, गंगाझरी) हे १७ सप्टेंबर रोजी रायपूर-इतवारी पॅसेंजर गाडीने गंगाझरीला जाण्यासाठी सालेकसा येथून चढले होते. सायंकाळी ७.१५ वाजतादरम्यान या आरोपींनी येलसरे व प्रधान या प्रवाशांना धावत्या गाडीत गंगाझरी जवळ-जवळ शस्त्राचा धाक दाखवून मारहाण केली. तसेच येलसरेंचा मोबाईल व रोख ५४० रूपये असलेली पर्स तसेच प्रधान यांचा ९० रूपये रोख असलेली पर्स हिसकावून गाडीतून पळून काढला.
यानंतर दोन्ही प्रवाशांनी गंगाझरी स्टेशन मास्तरांना या लुटमारीची माहिती दिली. त्यांनी लगेच गोंदिया रेल्वे पोलिसांना माहिती दिली. लगेच रेल्वे पोलिसांचे पथक गंगाझरीला रवाना झाले.
दरम्यान खबऱ्याने दिलेल्या माहितीनुसार पथकाने आरोपींचा शोध सुरू केला असता यातील एक आरोपी तिरोडा येथे तर अन्य चार तुमसर येथे हाती लागले. तसेच त्यांचा एक साथीदार पसार झाल्याचेही त्यांनी पोलिसांना सांगितले. पोलिसांनी त्यांच्याकडून चोरलेला मोबाईल व कुकरी जप्त केली आहे.
या आरोपींना गुरूवारी (दि.१८) नागपूर येथे न्यायालयात हजर करण्यात आले असता न्यायालयाने त्यांना २३ तारखेपर्यंत पोलीस कोठडी सुनावली आहे. विशेष म्हणजे, या आरोपींवर गोंदिया शहर पोलिसांत अन्य गुन्हे दाखल असल्याची माहिती रेल्वेचे पोलिस निरीक्षक संजय सिंग यांनी दिली.
घटनेच्या काही तासांतच आरोपींना पकडण्यात यश आले असून ही कामगिरी पोलीस निरीक्षक सिंग, पोलीस उपनिरीक्षक सुरेश बोधी, आरपीएफचे निरीक्षक माणिकचंद, तुमसरचे रेल्वे पोलीस उपनिरीक्षक टेंभूर्णीकर, सहायक पोलीस उपनिरीक्षक विनोद टप्पे, हवालदार शैलेश उके, रोशन मोगरे, विजय नंदनवार, आरक्षक एस.एस.कुशवाह व अन्य कर्मचाऱ्यांनी यशस्वी केली. (शहर प्रतिनिधी)