परीक्षा शुल्काच्या नावाखाली विद्यार्थ्यांची आर्थिक लूट

चामोर्शी : कोरोना काळात पालक, विद्यार्थी हतबल असतानाच यावर्षी दहावी, बारावीच्या विद्यार्थ्यांकडून तालुक्याच्या लखमापूर बाेरी येथील शाळेच्या मुख्याध्यापकांनी परीक्षा शुल्काच्या नावाखाली विद्यार्थ्यांकडून अधिक पैशाची वसुली करून आर्थिक लूट केल्याची तक्रार शिक्षक परिषदेचे पदाधिकारी व विद्यार्थ्यांनी केली आहे. या तक्रारीची दखल घेत माध्यमिक शिक्षणाधिकाऱ्यांनी सदर शाळेला भेट दिली.लखामापूर बोरी येथील भगवंतराव हायस्कूलमध्ये दहावी व बारावीत शिक्षण घेणाऱ्या विद्यार्थ्यांकडून बोर्ड परीक्षा फीच्या नावाखाली नियमबाह्यरित्या जादाची परीक्षा फी तेथील शाळेच्या मुख्याध्यापकांनी घेतल्याची तक्रार तेथील विद्यार्थ्यांनी व महाराष्ट्र राज्य शिक्षक परिषदेच्या जिल्हाध्यक्षांनी जि.प.च्या माध्यमिक शिक्षणाधिकारी यांच्याकडे ५ जानेवारीला दाखल केली. शिक्षणाधिकाऱ्यांनी दखल घेत खाजगी शाळा सेवाशर्ती नियमावली १९८१ मधील तरतुदींनुसार प्रशासकीय कार्यवाही का करण्यात येऊ नये? या बाबतचा खुलासा पुराव्यासह सदर शाळेच्या मुख्याध्यपकांना ११ जानेवारी २०२१ पर्यंत मागविला आहे. ९ जानेवारीला माध्यमिक विभागाचे शिक्षणाधिकारी आर.पी. निकम यांनी सदरच्या प्रकरणात चौकशीसाठी भगवंतराव हायस्कूल येथे भेट देऊन दहावी, बारावीच्या विद्यार्थ्याचे लेखी बयान घेतल्याची माहिती विद्यार्थ्यांनी दिली असून शाळेकडून विद्यार्थ्यांना जादा घेतलेली फी परत दिल्याचेही विद्यार्थ्यांनी सांगितले.

यासंदर्भात मुख्याध्यापकांना विचारणा केली असता, दोन वर्षांपासून वेतनेत्तर अनुदान बंद आहे. विद्यार्थांचे परीक्षेचे फॉर्म भरण्यासाठी इंटरनेट अडचणीमुळे बरेचदा तालुका किंवा जिल्हा मुख्यालयी जावे लागत होते तसेच इतर खर्च देखील येत होता. कोरोना काळात शाळा आपल्या दारी अंतर्गत गावात भिंती रंगविण्याचा खर्च येत होता. हा खर्च भरून काढण्यासाठी विद्यार्थ्यांच्या संमतीने १०० रुपये अधिकचे घेतले होते. परंतू काहींनी तक्रार करताच ते पैसे परत केले, असे सदर शाळेच्या मुख्याध्यापकांनी लाेकमतशी बाेलताना सांगितले.

काेट

सर्व शाळेच्या मुख्याध्यापकांनी दहावी व बारावी बोर्डाने ठरवून दिलेल्या शुल्काचा तपशील शाळेच्या फलकावर विद्यार्थ्यासाठी उपलब्ध करून द्यावा. शिक्षक परिषद शिक्षक शिक्षकेत्तर कर्मचारी सोबतच विद्यार्थ्यांना न्याय मिळवून देण्यासाठी नेहमी संघटना प्रयत्नशील आहे.

संताेष सुरावार, जिल्हाध्यक्ष, शिक्षक परिषद गडचिराेली

विद्यार्थ्याच्या व शिक्षक परिषदेच्या तक्रारीनुसार ९ जानेवारीला शाळेला भेट देऊन विद्यार्थ्याचे बयान घेतले असून जादा घेतलेली फी विद्यार्थ्यांना परत करावयास लावली. याप्रकरणी संबधित मुख्याध्यापकावर नियमानुसार योग्य कार्यवाही करण्यास संस्थेला कळविण्यात येईल.

आर.पी. निकम, माध्यमिक शिक्षणाधिकारी गडचिराेली