सरकारविरोधात २४ ला ‘जेल भरो’ आंदोलन

अहेरी : महाराष्ट्रातील महाविकास आघाडी सरकारच्या नाकर्तेपणा व निष्काळजीपणामुळे सर्वसामान्य जनतेला अनेक अडचणींना सामोरे जावे लागत आहे. या निष्क्रिय सरकारला जागे करण्यासाठी भारतीय जनता पक्षाच्या वतीने २४ फेब्रुवारी रोजी संपूर्ण महाराष्ट्रात जेल भरो आंदोलन करण्यात येणार आहे. त्याच अनुषंगाने अहेरी विधानसभा क्षेत्रात २४ फेब्रुवारी रोजी सकाळी १० वाजता खासदार अशोक नेते यांच्या नेतृत्वाखाली जेल भरो आंदोलन करण्यात येणार आहे.

लॉकडाऊनच्या काळात सर्वसामान्य नागरिक व शेतकऱ्यांना भरमसाट वीज बिले पाठवून त्यांच्या कठीण परिस्थितीशी खेळणाऱ्या सरकारला धडा शिकविणे आवश्यक आहे. लॉकडाऊनच्या काळात सर्वसामान्य जनतेच्या हाताला काम नसताना महागाई वाढविली. शेतकऱ्यांना त्रास देणाऱ्या नाकर्त्या सरकारला जागे करून त्याला धडा शिकविण्यासाठी २४ फेब्रुवारी रोजी संपूर्ण महाराष्ट्रात जेल भरो आंदोलन करण्यात येणार आहे, अशी माहिती खासदार अशोक नेते यांनी दिली. आलापल्ली विश्रामगृहात आयोजित अहेरी विधानसभा क्षेत्राच्या बैठकीत मार्गदर्शन करताना ते बोलत होते.

यावेळी प्रमुख पाहुणे म्हणून भाजपचे जिल्हा संघटन महामंत्री रवींद्र ओल्लालवार, अनुसूचित जनजाती मोर्चाचे प्रदेश सदस्य संदीप कोरेत, भाजपचे जिल्हा सचिव विनोद आकनपल्लीवार, ज्येष्ठ नेते दामोदरजी अरगेला, अहेरी तालुकाध्यक्ष रवींद्र नेलकुद्री, अहेरी शहराध्यक्ष मुकेश नामेवार, तालुका महामंत्री मद्दीवार, तालुका महामंत्री पोशालू चुधरी, एटापल्लीचे भाजयुमोचे निखिल गादेवार तसेच भाजप पदाधिकारी व कार्यकर्ते उपस्थित होते.