धारणे कुटुंबावर काळाचा आघात

आरमोरी तालुक्यातील देऊळगाव येथे रविवारी रात्री १२.३० वाजता अपघातात सहायक पोलीस निरीक्षक मनोज जनार्धन धारणे यांच्या कुटुंबातील पाच सदस्य ठार झाल्याची वार्ता ...

गडचिरोलीसह बोरमाळाही गहीवरले...
गडचिरोली : आरमोरी तालुक्यातील देऊळगाव येथे रविवारी रात्री १२.३० वाजता अपघातात सहायक पोलीस निरीक्षक मनोज जनार्धन धारणे यांच्या कुटुंबातील पाच सदस्य ठार झाल्याची वार्ता पहाटे गडचिरोलीकरांना माहीत होताच संपूर्ण शहर गहीवरून गेले. रविवारी सायंकाळी तीन तिरडीवरून पाच जणांचे शव अंत्यसंस्कारासाठी नेत असताना शेकडोच्या संख्येने नागरिक रस्त्याच्या दुतर्फा उभे होते.
नागपूरवरून गडचिरोलीकडे येत असताना सहायक पोलीस निरिक्षक मनोज जनार्धन धारणे यांच्या टाटा इंडिका कारला देऊळगाव जवळील तुळशीराम शिवराम हरडे यांच्या घरासमोर टेम्पोने धडक दिली. या धडकेत धारणे यांच्या मातोश्री विमल जनार्धन धारणे, भाऊसून वनिता प्रवीण धारणे, अडीच वर्षीय हर्षीता प्रवीण धारणे या मायलेकींसह चार महिन्यांची रिध्दी प्रशांत धारणे या ठार झाल्या. या सर्वांचे शव आरमोरी उपजिल्हा रूग्णालयात रात्रीच आरमोरी पोलीस ठाण्याचे पोलीस निरीक्षक सुभाष ढवळे, पोलीस उपनिरिक्षक नरवटे, सहायक फौजदार दिलीप मुनघाटे, सहायक फौजदार पुण्यप्रेडीवार, पोलीस हवालदार मच्छीरके, कुमरे यांच्या मदतीने नेण्यात आले. त्याचबरोबर यातील जखमी सुषमा मनोज धारणे व इशिका मनोज धारणे यांना तत्काळ उपचारासाठी नागपूरला पाठविले. अपघातग्रस्त वाहन आरमोरी पोलीस ठाण्यात आणण्यात आले. या घटनेची वार्ता पहाटे गडचिरोली शहरात फिरायला जाणाऱ्या नागरिकांना सर्वप्रथम कळली. त्यानंतर शेकडो नागरिक वाहन घेऊन आरमोरी पोलीस ठाण्यात पोहोचले. तर अनेकांनी धारणे यांच्या कॅम्पएरिया भागातील घराजवळही गर्दी केली. एकाच कुटुंबावर काळाने घाला घातल्याने सर्वांनीच हळहळ व्यक्त केली.
उल्लेखनिय बाब म्हणजे, रिध्दी प्रशांत धारणे या चार महिन्यांच्या चिमुकलीची आई नागपूर येथे भरती असल्याने ती आपल्या आजीकडे गडचिरोलीलाच होती. शनिवारी तिला आईच्या भेटीसाठी नेण्यात आले. गडचिरोलीकडे परतताना तिच्यावरही काळाने घाला घातला. मृतकांमधील वनिता प्रविण धारणे ही गरोदर होती. रविवारी सकाळी आरमोरी विधानसभा क्षेत्राचे आमदार क्रिष्णा गजबे व गडचिरोलीचे आमदार डॉ. देवराव होळी या दोघांनी उपजिल्हा रूग्णालय आरमोरी येथे जाऊन धारणे कुटुंबीयांची चौकशी केली व त्यांचे सांत्वन केले. आरमोरी उपजिल्हा रूग्णालयाचे वैद्यकीय अधीक्षक डॉ. प्रमोद गवई यांनी मृतदेहाचे शवविच्छेदन केले. गडचिरोलीचे माजी आमदार डॉ. नामदेव उसेंडी यांनीही मृतकाच्या निवासस्थानी भेट देऊन कुटुंबियांचे सांत्वन केले. दिवसभर धारणे यांच्या निवासस्थानी शेकडो नागरिकांची मृतकाचे अंतिम दर्शन घेण्यासाठी रिघ लागली होती. आरमोरी उपजिल्हा रूग्णालयातून शवविच्छेदन पार पडल्यानंतर पाचही जणांचे मृतदेह दुपारी ३ वाजता त्यांच्या निवासस्थानी आणण्यात आले. त्यानंतर उपस्थित नागरिकांच्या व कुटुंबीयांच्या अश्रूंचा बांध फुटला. अनेकजण अंतिम दर्शन घेण्यासाठी लगबग करीत होते. त्यानंतर सायंकाळी साडेचार वाजताच्या सुमारास तीन तिरडींवर पाच मृतदेह ठेवून अंतिम यात्रा त्यांच्या निवासस्थानातून काढण्यात आली. चामोर्शी मार्गावर डाक कार्यालयापर्यंत तिरडीवर मृतदेहाचा प्रवास झाल्यानंतर स्वर्गरथातून मृतदेह वैनगंगा नदीच्या बोरमाळा घाटावर नेण्यात आले. धारणे कुटुंबीय हे मूळचे सावली तालुक्यातील बोरमाळा गावचे रहिवासी आहेत. बोरमाळातही या घटनेची माहिती सकाळीच पोहोचली. तेथूनही शेकडो लोक अंतिम दर्शन घेण्यासाठी गडचिरोलीत दाखल झाले होते. त्यानंतर बोरमाळा नदी घाटावर सायंकाळी साडेपाच वाजता एकाच चितेवर सर्वांना अग्नी देण्यात आला. यावेळी पुन्हा एकदा उपस्थित जनसमुदाय गहीवरला. या अपघातात जखमी असलेल्या सुषमा मनोज धारणे व ईशिका मनोज धारणे या मायलेकींची प्रकृती गंभीर असल्याची माहिती लोकमतशी बोलताना कुटुंबीयांनी दिली. (नगर प्रतिनिधी)