जिल्ह्यात वैद्यकीय महाविद्यालय स्थापन करा

लाेकमत न्यूज नेटवर्क

गडचिराेली : गडचिराेली जिल्ह्यातील आराेग्य यंत्रणा बळकट करण्यासाठी जिल्ह्यात वैद्यकीय महाविद्यालय स्थापन करावे, अशी मागणी जिल्हा युवक काँग्रेसने आराेग्य राज्यमंत्री राजेंद्र पाटील-यड्रावकर यांच्याकडे केली आहे.

काँग्रेस पदाधिकाऱ्यांच्या शिष्टमंडळाने शनिवारी गडचिराेली येथील विश्रामगृहात यड्रावकर यांची भेट घेऊन त्यांना निवेदन दिले. तसेच वैद्यकीय महाविद्यालयाच्या प्रश्नावर चर्चा केली. यावेळी जिल्हा युवक काँग्रेसचे अध्यक्ष महेंद्र ब्राह्मणवाडे, नगरसेवक सतीश विधाते, अनुसूचित जाती सेलचे अध्यक्ष रजनीकांत मोटघरे, मीडिया सेलचे जिल्हाध्यक्ष नंदू वाईलकर, शहर काँग्रेसचे उपाध्यक्ष राकेश रत्नावार, तालुका युवक काँग्रेसचे अध्यक्ष घनश्याम मुर्वतकर, जिल्हा उपाध्यक्ष एनएसयुआय गौरव अलाम, काँग्रेस जिल्हा महासचिव अनिल कोठारे, एनएसयुआयचे महासचिव गौरव येनप्रेडीवार, मयूर गावतुरे, रुपेश गुजरकर, रोहित चंदावार, शरद भजभुजे, सोनू कोलते आदी उपस्थित हाेते.

भारतातील २५ मागासलेल्या जिल्ह्यांमध्ये गडचिरोली जिल्ह्याचा समावेश होतो. या जिल्ह्यातील भौगोलिक परिस्थिती अतिशय गंभीर असून, जिल्ह्यात कुठलेही उद्योगधंदे उपलब्ध नाहीत. येथील जनता गोरगरीब असून, त्यांना उपचारासाठी नागपूरला जावे लागते. जिल्ह्यातील जनतेला यामुळे नाहक त्रास सहन करावा लागतो. त्यामुळे जिल्ह्यात वैद्यकीय महाविद्यालय सुरू करावे तसेच जिल्ह्यातील वैद्यकीय अधिकाऱ्यांची रिक्त पदे लवकर भरावीत, अशी मागणी या निवेदनातून करण्यात आली आहे.