अभियंत्याची मालमत्ता कोटींवर

आरमोरी पंचायत समितीत शाखा अभियंता (वर्ग-३) या पदावर कार्यरत असलेले मनोज झेंबाजी मोटघरे याला ५० हजार रूपयांची लाच घेताना गडचिरोली येथील....

धाडसत्र : नागपूर, आरमोरीतील घराची झडती
गडचिरोली : आरमोरी पंचायत समितीत शाखा अभियंता (वर्ग-३) या पदावर कार्यरत असलेले मनोज झेंबाजी मोटघरे याला ५० हजार रूपयांची लाच घेताना गडचिरोली येथील लाचलुचपत प्रतिबंधक विभागाच्या पथकाने मंगळवारी अटक केली होती. त्यानंतर लगेच त्याच्या नागपूर व आरमोरी येथील घराची झडती घेण्यात आली. या झडतीत त्याच्याकडे १ कोटी १ लाख १५ हजार ३७० रूपयांची मालमत्ता असल्याचे एसीबीला आढळून आले आहे.
आरमोरी तालुक्यातील वडधा ग्राम पंचायतमध्ये मनेरगांतर्गत १ लाख ८७ हजार ८८४ रूपयांच्या कामाचे बिल मंजूर करून देण्यासोबतच एमबी रजिस्टर तयार करण्याकरिता शाखा अभियंता मनोज मोटघरे याने ५० हजार रूपयांची लाच घेतली होती. त्याच्या विरूद्ध आरमोरी पोलीस ठाण्यात गुन्हा दाखल करण्यात आला. त्यानंतर लाचलुचपत प्रतिबंधक विभागाच्या पथकाने त्याच्या नागपूर व आरमोरी येथील घराची झडती घेतली.
नागपूर येथील घर झडतीदरम्यान त्याच्या घरी तीन लाख २५ हजार रूपये रोख, १२० ग्रॅम सोने, मिहान भागात आठ लाख रूपये किमतीचा प्लॉट, बँकेतील शिल्लक ९५ हजार ४३८ व घरगुती साहित्य असे मिळून २४ लाख १८ हजार ४४० रूपयांची मालमत्ता मिळून आली.
आरमोरी येथील घर झडतीमध्ये १७ लाख २२ हजार ८३० रूपये रोख, नागपूर येथील प्लॅटची किंमत पाच लाख ५० हजार ९१८, आरमोरी व इतर ठिकाणी असलेले सात प्लॉट किंमत नऊ लाख १९ हजार, पत्नी व त्यांच्या नावे असलेल्या बँक खात्यातील शिल्लक रक्कम २२ लाख सहा हजार १८६, आरमोरी येथील घराची किंमत आठ लाख एक हजार, धानोरा येथील घराची किंमत ३५ हजार, फिगो कंपनीचे चारचाकी वाहन सात लाख दोन हजार, मोटारसायकल किंमत ६० हजार, दोन मुदतठेवी सात लाख, असे एकूण ७६ लाख ९६ हजार ९३० रूपयांची मालमत्ता आणि १० ग्रॅम सोने मिळून आले आहे.
दोन्ही ठिकाणी घेण्यात आलेल्या घर झडतीमध्ये २४ लाख १८ हजार ४४० रूपये व ७६ लाख ९६ हजार ९३० रूपये असे एकूण एक कोटी एक लाख १५ हजार ३७० रूपयांचे रोख व मालमत्ता एसीबीला आढळून आली.
सदर कारवाई पोलीस अधीक्षक राजीव जैन यांच्या मार्गदर्शनात पोलीस उपअधीक्षक रोशन यादव, पोलीस निरीक्षक दामदेव मंडलवार व त्यांच्या सहकाऱ्यांनी पार पाडली. (प्रतिनिधी)
१२ पर्यंत पोलीस कोठडी
लाचखोर शाखा अभियंता मनोज मोटघरे याला बुधवारी गडचिरोली येथील विशेष जिल्हा सत्र न्यायालयात हजर करण्यात आले. न्यायालयाने त्याला १२ जूनपर्यंत पोलीस कोठडी सुनावली आहे, अशी माहिती पोलीस निरीक्षक दामदेव मंडलवार यांनी ‘लोकमत’शी बोलताना दिली.