‘त्या’ शोषण प्रकरणातील आरोपीची डीएनए चाचणी निगेटिव्ह

या प्रकरणात अज्ञात आरोपीविरोधात पोलिसांनी २३ ऑगस्टला भादंवि कलम ३७६ (२) (जे) सह पोस्को कायद्याच्या कलम ४ अन्वये गुन्हा दाखल केला होता. घरकाम करणाऱ्या अल्पवयीन मुलीच्या असहायतेचा फायदा घेत तिच्याशी आरोपीने लैंगिक संबंध प्रस्थापित केल्याने ती गर्भवती राहिल्याची बाब वैद्यकीय चाचणीनंतर लक्षात आल्याने आणि प्रसारमाध्यमातून हे प्रकरण गाजल्याने शासनाच्या वतीने पोलीस ठाण्यात फिर्याद नोंदविली होती. पीडिता गर्भवती असल्याने तिची डीएनए चाचणी करण्यास वेळ लागला. यादरम्यान अटकेत असलेल्या आराेपीची न्यायालयीन कोठडीत रवानगी केली होती.

यादरम्यान पीडित मुलीची प्रसूती झाली व तिला बाळही झाले. यानंतर अटकेत असलेल्या आरोपी किरण अग्रवाल याची डी.एन.ए. तपासणी करण्यात आली. या तपासणीचा रिपोर्ट निगेटिव्ह आल्याने जिल्हा सत्र न्यायालयाने २ फेब्रुवारीला अग्रवाल यांना जामीन दिला.

त्या बाळाचा बाप कोण?

या प्रकरणात उपविभागीय पोलीस अधिकारी जयदत्त भंवर यांनी न्यायालयात चार्जशिट दाखल केल्याचे सांगितले, पण ज्याला आरोपी म्हणून दाखविले त्याची डीएनए चाचणी जर निगेटिव्ह असेल तर, पीडित अल्पवयीन मुलीवर मातृत्व लादणारा तिच्या बाळाचा बाप कोण? असा प्रश्न शिल्लक आहे. नागरिकांमध्येही याबाबतची चर्चा सुरू आहे. वास्तविक या प्रश्नाचे खरे उत्तर पीडित मुलगीच देऊ शकते. पण कायद्याच्या पळवाटांचा फायदा संबंधिताला मिळाला तरी मग खरा आरोपी कोण? हे शोधून काढण्याचे आव्हान पोलीस स्वीकारतील का, असा प्रश्न लोक विचारत आहेत. या प्रकरणात सामाजिक, राजकीय संघटना कोणती भूमिका घेतात याकडेही नागरिकांचे लक्ष लागले आहे.