ट्रकच्या धडकेत सायकलस्वार गंभीर

भरधाव ट्रकने धडक दिल्याने सायकलस्वार गंभीर जखमी झाल्याची घटना शुक्रवारी रात्री १० वाजताच्या सुमारास आष्टी येथील पेट्रोल पंपाजवळ घडली.

आष्टी येथील घटना : चंद्रपूरला हलविलेआष्टी : भरधाव ट्रकने धडक दिल्याने सायकलस्वार गंभीर जखमी झाल्याची घटना शुक्रवारी रात्री १० वाजताच्या सुमारास आष्टी येथील पेट्रोल पंपाजवळ घडली. केमाजी तिमाडे (५०) रा. आष्टी असे जखमी झालेल्या इसमाचे नाव आहे. केमाजी तिमाडे हे आष्टीनजीकच्या पेट्रोल पंपावर काम करतात. गुरूवारी रात्री १० वाजताच्या सुमारास एमएच-३४-एबी-६४८८ हा ट्रक गडचिरोलीवरून आलापल्लीकडे आष्टी-आलापल्ली मार्गाने जात होता. दरम्यान पेट्रोलपंपानजीक या ट्रकने सायकलीने जात असलेल्या केमाजी तिमाडे याला धडक दिली. यात केमाजी यांच्या हाताला व तोंडाला जबर मार लागला. लागलीच त्यांना आष्टीच्या ग्रामीण रुग्णालयात उपचारासाठी दाखल करण्यात आले. शनिवारी सकाळी त्याची प्रकृती गंभीर झाल्याने त्याला चंद्रपूरच्या रुग्णालयात हलविण्यात आले.या अपघातातील ट्रकचालकाचे नाव तुळशिराम भिमटे (३०) रा. गोंदिया असे आहे. तर अपघातग्रस्त ट्रक आलापल्ली येथील अमोल रापर्तीवार यांच्या मालकीचा आहे. वृत्त लिहिस्तोवर आष्टी पोलीस ठाण्यात कुणावरही गुन्हा दाखल करण्यात आलेला नव्हता. (प्रतिनिधी)