मेंढेबोळी येथील दोन दारू विक्रेत्यांवर गुन्हा दाखल

आरमोरी तालुक्यातील मेंढेबोळी गावात दारूविक्रीचे प्रमाण अधिक आहे. जवळपास २२ दारूविक्रेते सक्रिय आहेत. परिसरातील गावांनाही येथूनच मोहफुलाच्या दारूचा पुरवठा केला जातो. यामुळे परिसरातील नागरिक त्रस्त झाले आहेत. मुजोर दारूविक्रेत्यांना धडा शिकविण्यासाठी आरमोरी पोलीस व मुक्तिपथने संयुक्त कारवाई करण्याचे ठरविले. त्यानुसार, जंगल परिसरात शोधमोहीम राबवून ३ दारूभट्ट्या उद्ध्वस्त करण्यात आल्या. एका ठिकाणाहून ४० लीटर मोहफुलाची दारू व साहित्य जप्त करण्यात आले, तर २५० लीटर मोहसडवा नष्ट करण्यात आला. या प्रकरणी चरणदास मुंगीकोल्हे व तुला मडावी या दोन्ही दारूविक्रेत्यांवर आरमोरी पोलीस ठाण्यात गुन्हा दाखल करण्यात आला आहे.

गडचिरोली जिल्ह्याची दारूबंदी अधिक मजबूत व्हावी व कायद्याची अंमलबजावणी योग्यरीत्या होण्यासाठी १० फेब्रुवारी रोजी पोलीस अधीक्षक अंकित गोयल यांच्यासह मुक्तिपथची बैठक झाली होती. त्यामध्ये अवैध दारू विक्रेत्यांवर कारवाई करण्यासाठी ॲक्शन प्लॅन तयार करण्यात आला आहे. त्यानुसार, आरमोरी पोलीस व मुक्तिपथने दारूविक्रेत्यांविरोधात धाडसत्र सुरू केले असून, त्रासदायक गावांना लक्ष्य केल्या जाणार आहे. यामुळे दारूविक्रेत्यांचे धाबे दणाणले आहेत. ही कारवाई आरमोरीचे पोलीस निरीक्षक दिगंबर सूर्यवंशी यांच्या मार्गदर्शनाखाली बिट अंमलदार चौके व त्यांचे सहकारी, तसेच मुक्तिपथ चमूने केली आहे.