दारू व तंबाखूमुक्त गाव निर्मितीसाठी ग्रा. पं पदाधिकाऱ्यांना प्रशिक्षण

एटापल्ली : तालुक्यातील तुमरगुंडा येथे मुक्तीपथ अभियानातर्फे ग्रामपंचायत पदाधिकाऱ्यांची कार्यशाळा आयोजित करण्यात आली होती. या माध्यमातून दारू व तंबाखूमुक्त गाव निर्माण करण्यासाठी सरपंच, उपसरपंच व सदस्यांना प्रशिक्षण देण्यात आले. या कार्यशाळेत चार ग्रामपंचायतीचे पदाधिकारी सहभागी झाले होते.

दरम्यान गावात उद्भ‌वणाऱ्या समस्यांवर विचारमंथन करण्यात आले. पेसा कायदा, दारूबंदी कायदा, तंबाखूबंदी कायद्यासंदर्भात विस्तृत माहिती देण्यात आली. ग्रामपंचायत दारू व तंबाखूमुक्त राहणे का आवश्यक आहे. निवडणुकीपूर्वी निवडून येणाऱ्या उमेदवारांनी दारू व तंबाखूमुक्त गावाचे वचन दिले होते. त्याची वचनपूर्ती करणे. कोरोना काळात खर्रा व तंबाखूजन्य पदार्थांचे सेवन करून थुंकल्यामुळे विषाणूचे संक्रमण वाढण्याची शक्यता आहे. यासाठी गावातून तंबाखू हद्दपार करण्यासाठी प्रयत्न करणे. ग्रामपंचायत अंतर्गत येणाऱ्या गावात अवैध दारूविक्री सुरु असल्यास त्यांना नोटीसच्या माध्यमातून दारूविक्री बंद करण्याचे आवाहन करणे. दारूबंदी असून तंबाखूविक्री सुरु असल्यास तंबाखूजन्य पदार्थांची विक्री बंद करणे. गावातील अवैध दारू व तंबाखूविक्री बंद झाल्यास गावाचा विकास होणार, याचा लाभ ग्रामपंचायतला मिळणार, आदींबाबत तुमरगुंडा, कांदोळी, येमली, गुरूपल्ली येथील सरपंच, उपसरपंच व सदस्यांना मार्गदर्शन करण्यात आले.

कार्यशाळेत तुमरगुंडा ग्रामपंचायतचे सरपंच सविता गावडे, उपसरपंच लालसू कुलभेटी, सदस्य मनोज कोलामी, वनमाला कंगाली, ताराबाई गावडे, नंदकुमार गावडे, कर्मचारी अशोक गावडे, कांदोळी ग्रामपंचायतचे सरपंच झुरू मडावी, उपसरपंच जिनीबाई मडावी, सदस्य सविता उसेंडी, येमली ग्रामपंचायतचे सदस्य माधुरी अलाम, गुरुपल्लीचे उपसरपंच बाळू आत्राम आदी सहभागी झाले होते. उपस्थित ग्रामपंचायत सरपंच, उपसरपंच, सदस्य व कर्मचाऱ्यांना मुक्तिपथ तालुका संघटक किशोर मलेवार यांनी मार्गदर्शन केले. आभार संदीप तलांडे यांनी मानले .