निवडणूक नसताना कुंभीटोल्याचे नागरिक करणार मतदान

कुरखेडा : गावात निवडणूक नसली तरी दुसऱ्या गावातील मतदार यादीत नाव गेल्याने कुंभीटोला येथील २५ ते ३० मतदार मतदानाचा हक्क बजावू शकतील. हा प्रताप तालुका निवडणूक यंत्रणेच्या चुकीमुळे घडणार आहे. ऐन मतदानाच्या पूर्वसंध्येला ही बाब उघडकीस आल्यामुळे प्रशासनही हतबल झाले असून, ‘त्या’ मतदारांना मतदान करता येणार असल्याचे स्पष्ट करण्यात आले आहे.

कुरखेडा तालुक्यातील ४५ ग्रामपंचायतींपैकी ४३ ग्रामपंचायतींमध्ये पहिल्या टप्प्यात निवडणूक होत आहे. ज्या दोन गावांमध्ये निवडणूक नाही त्यात कुंभीटोला आणि नवेझरी या ग्रामपंचायती आहेत. या ग्रामपंचायतींचा कार्यकाळ पुढील दोन वर्षांनी संपणार आहे. मात्र, असे असताना चिखली ग्रामपंचायतीच्या चिचटोला प्रभागाच्या मतदार यादीत कुंभीटोला येथील २५पेक्षा जास्त ग्रामस्थांची नावे समाविष्ट केली आहेत. मतदार यादीतील नावांचा शोध घेत काही उमेदवार प्रचाराच्या निमित्ताने त्यांच्या घरी पोहोचल्यानंतर या मतदारांना ही बाब समजली. आमच्या गावात निवडणूक नसताना आमचे मतदार यादीत नाव कसे? असा प्रश्न करत त्यांनी आश्चर्य व्यक्त केल्यानंतर निवडणूक विभागाचा हा सावळागोंधळ समोर आला.

(बॉक्स)

यादी अद्यावतीकरणात हलगर्जीपणा

ग्रामपंचायतीची प्रभागनिहाय मतदार यादी अद्ययावत करण्याची जबाबदारी शासकीय यंत्रणेतील संबंधित कर्मचाऱ्यांकडे सोपविण्यात येते. हे करताना संबंधित कर्मचाऱ्यांच्या हलगर्जीपणामुळे हा गोंधळ झाला असण्याची शक्यता आहे. चिखली ग्रामपंचायतींतर्गत येणाऱ्या चिचटोला या गावातील काही मतदार लोकसभा, विधानसभा निवडणुकीत कुंभीटोला बुथवर येत असतात. त्यामुळे ग्रामपंचायतीची मतदार यादी तयार करताना प्रत्यक्ष गावात जाऊन आढावा न घेता, टेबलवर बसूनच यादी तयार केल्याने हा गोंधळ उडाला असण्याची शक्यता आहे. अशास्थितीत आता कुंभीटोल्यातील ‘ते’ ग्रामस्थ चिखली गावासाठी मतदानाचा हक्क बजावणार का? याकडे सर्वांचे लक्ष लागले आहे.

(कोट)

डिसेंबर महिन्यात ग्रामपंचायतीच्या मतदार याद्या प्रकाशित झाल्या. मतदार यादीवर आक्षेप घेण्याकरिता काही दिवसांचा वेळ दिला होता. परंतु, कुणीही आक्षेप घेतला नाही. त्यामुळे आता मतदार यादीत नाव असल्याने त्या मतदारांना मतदान करता येईल.

- आर. बी. चकोले

नायब तहसीलदार (निवडणूक), कुरखेडा