गडचिराेली : दर आठवड्यात पेट्राेल व डिझेलच्या किमतीत वाढ करुन केंद्र शासनाने सर्वसामान्य जनतेची थट्टा चालविलेली आहे. वर्तमान स्थितीत काेराेनामुळे आधीच महागाईची झळ साेसणाऱ्या जनतेला इंधन दरवाढीमुळे माेठा आर्थिक फटका बसत आहे. केंद्र शासनाने केलेल्या दरवाढीचा निषेध नाेंदविण्यासाठी बहुजन रिपब्लिकन साेशालिस्ट पार्टीच्या वतीने शुक्रवार ५ फेब्रुवारीला गडचिराेली शहरातून सायकल रॅली काढून निषेध नाेंदविण्यात आला.
केंद्र सरकारकडून दर १० दिवसात पेट्रोल, डिझेल व गॅसच्या किंमतीमध्ये वाढ करण्यात येत आहे. ही बाब निंदनीय, दुखद व तेवढीच निषेधार्ह आहे. केंद्र सरकारने २०२०-२१ या वित्त वर्षात दोनदा पेट्रोल व डिझेलच्या उत्पादन शुल्कात वाढ केली. पेट्रोलवरील उत्पादन शुल्क १३ रुपये व डिझेलवरील १६ रुपये वाढवून अनुक्रमे पेट्रोल ३२.९८ व डिझेल ३१.८३ रुपये उत्पादन शुल्क आकारले जात आहे. एवढेच नव्हे तर उत्पादन शुल्कासह, डिलरचे कमिशन ४ ते ५ रुपये, राज्याचा वॅट १५ ते २० रुपये भाडे व अन्य असा एकूण खर्च पकडून पेट्रोल, डिझेलची किंमत घेतलेल्या रकमेच्या किमान तिप्पट होत आहे. त्यामुळे सर्वसामान्य जनतेवर आर्थिक बाेजा पडत आहे. त्यामुळे केंद्र शासनाने पेट्राेल-डिझेल दरवाढ मागे घ्यावी, अशी मागणी बहुजन रिपब्लिकन पार्टीच्या वतीने करण्यात आली.
यासंदर्भात खा. अशाेक नेते व जिल्हाधिकाऱ्यांच्या माध्यमातून पंतप्रधानांना निवेदन पाठविण्यात आले. सायकल रॅलीत विदर्भ प्रदेश सचिव डाॅ. कैलास नगराळे, जिल्हाध्यक्ष राज बन्सोड, जिल्हा प्रभारी सदाशिव निमगडे, जिल्हा महासचिव पुरुषोत्तम रामटेके, युवा आघाडी जिल्हाध्यक्ष प्रतीक डांगे, जिल्हा काेषाध्यक्ष मिलिंद बांबोळे, महेश टिपले, जितेंद्र बांबोळे, प्रफुल रायपुरे, संघरक्षित बांबोळे, तुषार भडके, गोकुल ढवळे, हेमंत नैताम यांच्यासह अनेक कार्यकर्ते सहभागी झाले हाेते.
बाॅक्स
कराचा बाेजा सवलतीतून वसूल करावा
१ फेब्रुवारी २०१५ रोजी पेट्राेलचे दर ६५ रुपयापर्यंत हाेते. परंतु पेट्राेलचे दर शतकाच्या उंबरठ्यावर आहेत. लगतच्या देशांमध्ये इंधनाचे दर कमी असताना भारतातच किंमती का वाढल्या, असा सवाल बीआरएसपीने केला आहे. पेट्रोल,डिझेल व गॅसवरचा विविध करांचा बोझा कमी करून इंधनांचे भाव कमी करावे. तसेच कराचा बोझा मंत्री, खासदार व आमदार यांना दिलेल्या विविध सवलतीमधून तो वसूल करावा, अशी मागणी बीआरएसपीने केली आहे.