विहिरीत मृतावस्थेत आढळला बिबट

वडसा वन परिक्षेत्रांतर्गत येणाऱ्या शंकरपूर उपक्षेत्रातील पेंदा येथील कुसराम यांच्या शेतातील विहिरीत बिबट पडल्याची माहिती चाेपच्या वनरक्षकांना मिळाली. त्यांनी वनकर्मचाऱ्यांना घेऊन घटनास्थळ गाठले व पाहणी केली असता, बिबट मृतावस्थेत आढळून आला. याची माहिती त्यांनी वन परिक्षेत्र अधिकारी रा.म. शिंदे यांना व शंकरपूरच्या क्षेत्र सहायकांना दिली. त्यानंतर अधिकारी घटनास्थळी पाेहाेचले. मृत बिबट्याला विहिरीच्या बाहेर काढून वन परिक्षेत्रात आणण्यात आले. त्यानंतर २ जानेवारीला उपवनसंरक्षक, उपविभागीय वनाधिकारी, वनपरिक्षेत्र अधिकारी, पशुवैद्यकीय अधिकारी व मानद वन्यजीव रक्षकांनी मृत बिबट्याची पाहणी केली.

पशुवैद्यकीय अधिकाऱ्यांनी बिबट्याचे शवविच्छेदन केले व नमुने फाॅरेंन्सीक चाचणीसाठी पाठविले. त्यानंतर मृत बिबट्याचे दहन करण्यात आले. बिबट्याचा मृत्यू नेमका कशामुळे झाला, याचा शाेध फाॅरेंन्सिक चाचणी अहवाल आल्यानंतरच लागणार आहे.