विद्यार्थ्यांच्या प्रश्नांवर विद्यापीठात घंटानाद

गडचिराेली : स्थानिक गाेंडवाना विद्यापीठाने सीजीएस अभ्यासक्रमाद्वारे परीक्षा ऑनलाईन पद्धतीने घ्यावी, चालू वर्षातील विद्यार्थ्यांना महाविद्यालयात प्रवेश घेण्यासाठी ऑनलाईन लिंक सुरू करावी या मागणीसाठी राष्ट्रवादी विद्यार्थी काँग्रेसच्या वतीने १ फेब्रुवारी राेजी विद्यापीठ परिसरात घंटानाद आंदाेलन करण्यात आले.

विद्यार्थ्यांच्या न्याय व हक्कासाठी राविकाँचे पदाधिकारी व कार्यकर्त्यांनी हे आंदाेलन केले. याप्रसंगी राविकाँचे जिल्हाध्यक्ष लिलाधर भरडकर, तालुकाध्यक्ष गिरीश काेरामी, माही ढाली, अक्षय मडावी, मयूरी साखरे, जयमाला दुर्वे, धनश्री वानखेडे, रवी रामटेक, आदींसह अनेक कार्यकर्ते उपस्थित हाेते. विद्यापीठाचे प्र-कुलगुरू डाॅ. श्रीराम कावळे व प्रभारी कुलसचिव डाॅ. अनिल चिताडे यांच्यासाेबत विद्यार्थ्यांच्या प्रश्नांवर सकारात्मक चर्चा करण्यात आली. विद्यार्थ्यांच्या मागण्यांचे निवेदन त्यांना देण्यात आले.

निवेदनात म्हटले आहे की, काेराेना संसर्गामुळे विद्यापीठांतर्गत विविध अभ्यासक्रमांमध्ये प्रवेशित विद्यार्थ्यांना ऑनलाईन परीक्षा देता आली नाही. तांत्रिक अडचणींमुळे ऑनलाईन परीक्षेचे फार्म सादर करून नाेंदणी करता आली नाही. ज्या विद्यार्थ्यांची ऑनलाईन नाेंदणी झाली अशा विद्यार्थ्यांना विद्यापीठाच्या ढिसाळ नियाेजनामुळे ऑनलाईन प्रश्नपत्रिका उपलब्ध हाेऊ शकली नाही. नेटवर्कच्या तांत्रिक अडचणीमुळे काही विद्यार्थ्यांना ऑनलाईन परीक्षा देणे शक्य झाले नाही. त्यामुळे विद्यापीठातील ७०० ते ८०० विद्यार्थ्यांना पुन्हा पदवी अभ्यासक्रमासाठी प्रथम वर्षापासून प्रवेश घ्यावा लागणार आहे. त्यामुळे विद्यापीठाने सीजीएस या जुन्या अभ्यासक्रमाद्वारेच परीक्षा ऑनलाईन पद्धतीने देण्याची संधी द्यावी, असे म्हटले आहे.