आरोपींना अटक करा अन्यथा ६ पासून उपोषण

आरमोरी तालुक्यातील देऊळगावनजीक इंजेवारी येथील पशुवैद्यकीय दवाखान्यात कार्यरत असलेल्या पशुवैकीय अधिकारी निलेश राठोड यांची पत्नी...

चव्हाण कुटुुंबीयांचा इशारा : किशोरी राठोड आत्महत्या प्रकरण
गडचिरोली : आरमोरी तालुक्यातील देऊळगावनजीक इंजेवारी येथील पशुवैद्यकीय दवाखान्यात कार्यरत असलेल्या पशुवैकीय अधिकारी निलेश राठोड यांची पत्नी किशोरी उर्फ जान्हवी राठोड हिने ७ जुलै रोजी आत्महत्या केल्याची घटना उघडकीस आली होती. पती डॉ. निलेश रामसिंग राठोड व सासरकडील सदस्यांच्या छळाला कंटाळून किशोरीने आत्महत्या केली, अशी तक्रार किशोरीच्या आई-वडिलांनी आरमोरी पोलीस ठाण्यात दाखल केली होती. या प्रकरणातील आरोपींवर गुन्हा दाखल करण्यात आला. मात्र त्यांना अद्यापही अटक करण्यात आली नाही. या प्रकरणातील सर्वच सहा आरोपींना तत्काळ अटक करावी, अन्यथा ६ सप्टेंबरपासून जिल्हाधिकारी कार्यालयासमोर आमरण उपोषण करणार, असा इशारा मृतक किशोरी हिची आई ललिता मोहन चव्हाण यांच्यासह चव्हाण कुटुंबियांनी दिला आहे.
या संदर्भात मृतक किशोरी राठोड हिची आई ललिता मोहन चव्हाण रा. कुंभारकिन्ही ता. दारव्हा जि. यवतमाळ यांनी जिल्हाधिकारी गडचिरोली यांना लेखी निवेदन सादर केले आहे. या निवेदनात त्यांनी म्हटले आहे की, हुंड्याच्या रक्कमेसाठी सासरच्या मंडळीकडून माझी मुलगी किशोरी उर्फ जान्हवी राठोड हिचा छळ करण्यात आला. छळ असह्य झाल्याने तिने आत्महत्या केली. या प्रकरणातील दोषी आरोपींवर आरमोरी पोलीस ठाण्यात गुन्हा दाखल करण्यात आला आहे. मात्र त्यांना अटक करण्यात आली आहे. त्यामुळे या प्रकरणातील मुख्य आरोपी निलेश रामसिंग राठोड, रामसिंग हरी राठोड, सविता रामसिंग राठोड, अक्षय रामसिंग राठोड, शंकर आडे व विष्णू आडे यांना तत्काळ अटक करावी, असे त्यांनी म्हटले आहे.