आरमोरी तालुक्यात २१६ जागांसाठी ४९९ उमेदवारांमध्ये होणार लढत

आरमोरी : तालुक्यातील २९ ग्रामपंचायतच्या २६३ जागांसाठी निवडणूक कार्यक्रम जाहीर झाला होता. प्रत्यक्षात २ ग्रामपंचायती पूर्णपणे अविरोध तर १७ ग्रामपंचायतींमधील ४७ उमेदवारांची अविरोध निवड झाली आहे. त्यामुळे आता २७ ग्रामपंचायतच्या २१६ जागांसाठी प्रत्यक्ष मतदान होत असून विविध संवर्गातील ४९९ उमेदवार निवडणुकीच्या रिंगणात आपले नशिब अजमावत आहेत.

आरमोरी तालुक्यातील ९ सदस्यसंख्या असलेल्या कुरंडीमाल व मोहझरी या दोन ग्रामपंचायती अविरोध झाल्याने २७ ग्रामपंचायतसाठी १५ जानेवारीला मतदान होत आहे. ४ जानेवारीला उमेदवारी अर्ज मागे घेण्याच्या शेवटच्या दिवशी ४६ इच्छुकांनी आपले नामनिर्देशनपत्र मागे घेतल्यानंतर निवडणूक रिंगणात उभ्या असलेल्या सर्व उमेदवारांना चिन्हांचे वाटप करण्यात आले. त्यामुळे आता प्रत्यक्ष निवडणुकीचे वातावरण गावखेड्यात तापायला सुरवात झाली आहे.

निवडणूक प्रक्रिया सुरू झाल्यावर २९ ग्रामपंचायतच्या २६३ जागांसाठी ६०१ नामनिर्देशनपत्र दाखल झाले. त्यापैकी ९ नामनिर्देशनपत्र छाननीमध्ये अवैध ठरले. तर ५९२ वैध ठरले. नामनिर्देशनपत्र मागे घेण्याच्या शेवटच्या दिवशी ४६ उमेदवारांनी माघार घेतली. तालुक्यातील १७ ग्रामपंचायतीच्या ४७ जागांसाठी प्रत्येकी एकाच उमेदवाराने नामनिर्देशनपत्र दाखल केल्याने व त्या उमेदवाराविरोधात दुसरा उमेदवार उभा नसल्याने ते ४७ ही उमेदवार अविरोध निवडून आले आहेत. विशेष म्हणजे निवडणूक रिंगणात उभे असलेले बहुतांश उमेदवार हे पहिल्यांदाच निवडणुकीत उतरले आहेत.

तालुक्यातील कुरंडीमाल व मोहझरी या दोन ग्रामपंचायती अविरोध झाल्या, या दोन्ही ग्रामपंचायती या आदिवासी क्षेत्रातील आहेत. तर भाकरोडी येथील प्रभाग क्रमांक १ व ३ तसेच चुरमुरा प्रभाग क्रमांक ३ हे तीन प्रभाग अविरोध झाले आहेत. येथील एकूण ९ पैकी ८ जागा अविरोध झाल्या. त्यामुळे फक्त एका जागेसाठी मतदान होणार आहे. कुरंडीमाल ही ग्रामपंचायत अविरोध होण्यासाठी माजी आमदार आनंदराव गेडाम यांनी पुढाकार घेतला.