मुंबई - महाराष्ट्राच्या चार मुली सॅफ 15 वर्षांखालील मुलींच्या अजिंक्यपद फुटबॉल स्पर्धेत भारताचे प्रतिनिधीत्व करणार आहेत. भुटान येथे 8 ते 19 ऑगस्ट या कालावधीत पार पडणा-या सॅफ स्पर्धेसाठी भारतीय संघ जाहीर करण्यात आला. महाराष्ट्राच्या प्रियांका सुजीश, जान्हवी शेट्टी व मेहक लोबो ( सर्व मुंबई) आणि अंजली बारके ( पुणे) यांनी 23 सदस्यीय भारतीय संघात स्थान पटकावले आहे.
संघातील चार आक्रमकपटूंमध्ये महेकचा समावेश आहे. प्रियांकाला डिफेन्सीव मिडफिल्डर, जान्हवीला राईट विंग किंवा सेंट्रल डिफेन्सीव्ह मिडफिल्डर आणि अंजलीला गोलरक्षक म्हणून खेळवण्यात येणार आहे. या स्पर्धेत भारताचा 'A' गटात समावेश करण्यात आला असून त्यांच्यासमोर श्रीलंका व यजमान भुटानचे आव्हान असणार आहे. 'B' गटात बांगलादेश, नेपाळ आणि पाकिस्तान यांचा समावेश आहे.