जय हिंद 'कॉन्स्टलेशन' मीडिया महोत्सवाचा जल्लोष; दुसऱ्या दिवशीही मान्यवरांच्या मांदियाळीने विद्यार्थ्यांमध्ये संचारला उत्साह!

कॉन्स्टलेशन 25–26: मास मीडियाच्या विद्यार्थ्यांनी घेतला जाहिरात, पॉडकास्टिंग आणि फूड ब्रँडिंगच्या क्षेत्रातील दिग्गजांकडून अनुभव!

जय हिंद महाविद्यालयातील मास मिडिया विभागाने आयोजित केलेला 'कॉन्स्टलेशन २५-२६' हा दोन दिवसीय मीडिया महोत्सव रेडिटच्या सहकार्याने दुसऱ्या दिवशीही विद्यार्थ्यांच्या उत्स्फूर्त प्रतिसादात मोठ्या उत्साहाने पार पडला. जाहिरात, पॉडकास्टिंग, डिजिटल ब्रँडिंग आणि मुंबईच्या फूड इंडस्ट्रीतील यशस्वी उद्योजकांनी या वेळी आपली यशोगाथा विद्यार्थ्यांसमोर मांडली आणि त्यांच्याशी मोकळेपणाने संवाद साधला.

गॅरी ग्रेवाल यांच्या 'दृश्य कथनशैली'ने झाली दिवसाची दमदार सुरुवात

महोत्सवाच्या दुसऱ्या दिवसाची सुरुवात चित्रपट आणि जाहिरात निर्मिती क्षेत्रातील दिग्गज गॅरी ग्रेवाल यांच्या सत्राने झाली. जाहिरात क्षेत्रातील त्यांच्या प्रदीर्घ प्रवासावर आणि महत्त्वाच्या मोहिमांच्या तयारीवर त्यांनी सखोल भाष्य केले. प्रभावी जाहिरात निर्मितीसाठी लागणारी 'दृश्य कथनशैली' कशी असावी, याचे मार्गदर्शन त्यांनी विद्यार्थ्यांना केले. विद्यार्थ्यांनी विचारलेल्या प्रत्येक प्रश्नाला त्यांनी सहजतेने आणि मनोरंजक पद्धतीने उत्तर देत, हे सत्र अधिक रंगतदार केले.

आधुनिक श्रोत्यांसाठी कथा कशी घडवाल? सुयश अगरवाल यांचे मार्गदर्शन

ग्रेवाल यांच्यानंतर, प्रसिद्ध पॉडकास्टर आणि स्वतंत्र कंटेंट क्रिएटर सुयश अगरवाल यांनी एक खास कार्यशाळा घेतली. 'आधुनिक श्रोत्यांना खिळवून ठेवणारी कथा कशी तयार करावी?', 'कथेतील भावनिक चढ-उतार कसे सांभाळावेत?' आणि 'सर्जनशील विचारांमध्ये येणारे अडथळे कसे दूर करावेत?' या महत्त्वपूर्ण विषयांवर त्यांनी विद्यार्थ्यांशी संवाद साधत त्यांना मोलाचे मार्गदर्शन केले.

मुंबईच्या 'फूड ब्रँड्स'चे संस्थापक आले एकाच व्यासपीठावर!

या महोत्सवातील सर्वात आकर्षण ठरलेल्या 'फाउंडर्स पॅनेल'मध्ये मुंबईतील यशस्वी फूड ब्रँड्सचे संस्थापक सहभागी झाले होते. यामध्ये 'बेण्णे'चे अखिल अय्येर, 'क्रॉफ्ल गाईज'चे अमय ठक्कर, 'मोकै'ची करीना आणि 'बोक्का'चे ट्रॅव्हिस ब्रागांझा यांचा समावेश होता. मुंबईच्या स्पर्धात्मक खाद्यजगतात आपला ब्रँड उभा करताना आलेली आव्हाने, ग्राहकांशी दीर्घकाळ टिकणारे नाते कसे निर्माण करावे आणि मेन्यूची ओळख कशी जपावी, अशा अनेक मुद्द्यांवर त्यांनी त्यांचे अनुभव शेअर केले.

डिजिटल ब्रँडिंग, सोशल मीडिया आणि स्वतःची ओळख

'द लॉबी रिपोर्ट'च्या संस्थापक आणि मार्केटर साची बियानी यांनी डिजिटल जगात स्वतःचे स्थान कसे निर्माण करायचे, यावर मार्गदर्शन केले. त्यांनी डिजिटल ब्रँडिंगचे महत्त्व, सोशल मीडियातील झपाट्याने होणारे बदल आणि या माध्यमातून आपली ओळख कशी घडवावी, यावर विद्यार्थ्यांशी महत्त्वपूर्ण संवाद साधला.

यानंतर reddit टीमने आयोजित केलेल्या संवादात्मक सत्रात 'ऑनलाईन समुदाय', 'इंटरनेटवरील ट्रेंड्स' आणि 'डिजिटल अभिव्यक्ती' यांसारख्या आधुनिक विषयांवर चर्चा करण्यात आली. तसेच, 'ब्रेक द सायलन्स' या चित्रपटातील अभिनेते राजांश सिंगल आणि हेमंत चौहान यांनी चित्रपटाच्या प्रमोशनसाठी थोडक्यात विद्यार्थ्यांशी संवाद साधला.

संपूर्ण दिवसाचा समारोप एका दमदार गायन सादरीकरणाने झाला. त्यानंतर कॉन्स्टलेशनच्या दोन दिवसांच्या प्रवासाची 'आफ्टरमूव्ही' प्रदर्शित करण्यात आली आणि मीडियाच्या या भव्य महोत्सवाचा उत्साही वातावरणात समारोप झाला.