कासारे येथे दोन टप्यात लॉकडाऊन

येथील ग्रामपंचायत सभागृहात तहसीलदार प्रवीण चव्हाणके यांच्या उपस्थितीत झालेल्या बैठकीत हा निर्णय घेण्यात आला. यावेळी सरपंच विशाल देसले, जिल्हा परिषद सदस्य गोकूळसिंग परदेशी यांच्यासह गावातील सर्व व्यापारी, ग्रामपंचायत सदस्य, सामाजिक कार्यकर्ते,पोलीस पाटील दीपक काकूस्ते, धीरज देसले, माजी सरपंच राकेश देसले, अनिल देसले, सदस्य बाळा खैरनार,रवींद्र चव्हाण, प्रशांत देसले, सचिन देसले, दीपक चौधरी उपस्थित होते.

गावात कोरोना पॉझिटिव्ह रुग्ण बहुसंख्येने वाढत आहेत त्यासाठी संपूर्ण व्यापारी वर्गाला विश्वासात घेऊन लॉकडाऊन व्हावे, असे प्राचार्य विकास देसले व विलास देसले यांनी सांगितले. गावातील वाढते रुग्ण संख्येचा विचार करून तपासणी कॅम्प होणेबाबत सुचविले. गावातील डॉक्टरांनी पेशंट तपासणी पूर्वी प्राथमिक आरोग्य केंद्रातून आरटीसीपीआर चाचणी करूनच उपचार करावेत, असे सरपंच विशाल देसले यांनी सुचविले. जिल्हा परिषद सदस्य गोकूळसिंग परदेशी यांनी गावातील पॉझिटिव्ह रुग्णांना उपचार भाडणे कोविड सेंटरला करावा. प्रशासनाने औषधांचा मुबलक साठा तालुक्यासाठी उपलब्ध करून द्यावा. प्राथमिक तपासणी आरोग्य केंद्रात करावी, असे सांगितले.

तहसीलदार प्रवीण चव्हाणके म्हणाले की, गावातील प्रत्येक कुटुंबाची घरोघरी जाऊन तपासणी करणेकामी वैद्यकीय अधिकारी प्राथमिक आरोग्य केंद्र यांनी नियोजन करावे. ग्रामपंचायतीने सर्वेक्षण पथकासाठी संपूर्ण मदत करावी. सर्वेक्षणासाठी तीस पथक तयार कराव्यात. प्रत्येक पथक ६० ते ७० कुटुंबांची तपासणी करेल .आरोग्य विभागाकडून रॅपिड एंटिजन टेस्ट उपलब्ध करावी. गावात कुठल्याही सार्वजनिक व धार्मिक कार्यक्रम होणार नाही याबाबत काळजी घ्यावी. होमक्वारंटाईन व्यक्ती घरात राहणेबाबत परिसरातील व्यक्तीने लक्ष ठेवावे. विनामास्क आढळल्यास दोनशे रुपये दंड आकारण्यात येईल, परिसरातील कुठलीही खासगी टॅक्सी, रिक्षा यावरून प्रवासी वाहतूक करणार नाहीत. कासारे गावातील लॉकडाऊन ८ एप्रिल संध्याकाळी ७ ते १८ एप्रिल सकाळी ७पर्यंत दहा दिवसांचा लॉकडाऊन राहील. दुसरा लॉकडाऊन २० ते २८ एप्रिल २०२१ रोजी सायंकाळपर्यंत म्हणजे आठ दिवसांचा राहील.

ग्राम विकास अधिकारी अनिल तोरवणे, पोलीस पाटील दीपक काकुस्ते यांनी गावातील मास्क नसलेल्या व्यक्तींना मास्क लावणेबाबत सूचित करण्याची सूचना केली. बैठकीचे प्रास्ताविक प्रा. युवराज काकुस्ते यांनी केले.