सांगवी शिवारात दुचाकी अपघातात दोन जण ठार

मुंबई आग्रा महामार्ग : अपघातात दोघांनाही दुखापत

शिरपूर : भरधाव वेगातील मोटारसायकलीने पुढे जाणाऱ्या दोन मोटारसायकलींना धडक दिली. यात अपघातात दोघांचा मृत्यू झाला. तर अन्य दोन जणांना दुखापत झाली असून त्यांच्यावर उपचार सुरु आहेत. हा अपघात बुधवारी सायंकाळी ६ वाजेच्या सुमारास शिरपूर तालुक्यातील सांगवी शिवारातील कालापाणी गावानजिक झाला.
शिरपूर तालुक्यातील झेंडेअंजन येथे राहणारे शत्रुघ्न गोकूळ गायकवाड (३५) दिलीप भिकला पावरा (३५) (रा. हाडाखेड, नवापाडा ता. शिरपूर) हे बुधवारी सायंकाळी ६ वाजेच्या सुमारास एमपी ४६ एमबी ८९६९ या क्रमांकाच्या मोटारसायकलीने शिरपूरकडून सेंधव्याकडे जात होते. त्याचवेळेस त्यांच्या पाठीमागून येणाऱ्या एमएच १८ एजी ८५९६ क्रमांकाच्या मोटारसायकलीने त्यांना धडक दिल्याने शत्रुघ्न गायकवाड व दिलीप पावरा हे गंभीर जखमी झाले. त्यांना रुग्णालयात दाखल केले असता डॉक्टरांनी तपासून मयत घोषीत केले. तर, एमएच १८ एजी ८५९६ याच मोटारसायकलीने आणखी थोडे पुढे जात एमपी ४६ एमजे ४२८९ या क्रमांकाच्या मोटारसायकलीला धडक दिली. यात दिनेश वेडू चौरे (२७) आणि आसमाबाई दिलीप पावरा (३८) (दोघे रा. झेंडेअंजन ता. शिरपूर) हे जखमी झाले. या अपघातप्रकरणी दिनेश चौरे याने शिरपूर तालुका पोलीस ठाण्यात फिर्याद दाखल केल्याने गुन्ह्याची नोंद करण्यात आली.