जागतिक वनदिनाच्या पूर्वसंध्येला नील गायीच्या वासरूला जीवदान

धुळे : येथून जवळच असलेल्या लळिंग कुरणातून वाट चुकलेले नील गायीचे वासरू धुळे शहरामध्ये काटेरी झुडपांमध्ये अडकले होते. सुज्ञ नागरिकांनी या वासरूची काळजी घेतली. वनविभागाने या वासराला सुखरूप लळिंग कुरणामध्ये सोडून जीवनदान दिले आहे. धुळे शहरात नटराज सिनेमा गृहाजवळच्या परिसरात काटेरी झुडपांमध्ये नील गायीचे वासरू अडकले असल्याचे गणेश शिरसाठ आणि मनोज शिरसाठ या तरुणांच्या निदर्शनाला आले. या वासरूची काटेरी झुडपांमधून सुटका करून त्याला बांधून ठेवले. त्याची काळजीदेखील घेतली. त्यानंतर वनविभागाला याबद्दल माहिती दिली. वनविभागाचे पथक तातडीने घटनास्थळी दाखल झाले. त्यांनी आपल्या वाहनातून या वासराला लळिंग कुरणात नेले आणि जंगलात सुखरूप सोडून दिले.

काही वर्षांपूर्वी लळिंग कुरणातूनच वाट चुकलेल्या बिबट्याच्या आठवणी अजूनही धुळेकरांच्या मनामध्ये ताज्या आहेत. धुळे शहरातील जिल्हा कारागृहाच्या शेतशिवारामध्ये बिबट्या आढळून आला होता. त्याला पकडण्यासाठी वनविभागाने मोठी धडपड केली. पिंजरे लावले, पिंजऱ्यात एका कुत्र्याला सावज म्हणून ठेवले. बिबट्याने कुत्रा फस्त केला. पण पिंजऱ्यात अडकला नाही. त्यानंतर वनविभागाने फार आटापिटा केला. तरीदेखील बिबट्या हाती का येत नाही हे पाहण्यासाठी जिल्हा कारागृहातील उभं पीक कापून टाकले. त्यावेळी बिबट्याने येथून पोबारा केल्याचे निदर्शनाला आले. हा बिबट्या शहरात कसा आला आणि शहरातून बाहेर कसा गेला, येताना आणि जातानादेखील तो कुणालाच कसा दिसला नाही, अशा अनेक प्रश्न अजूनही अनुत्तरित आहे.

नील गायीच्या या वासराला एक प्रकारे जीवदान मिळाले आहे. कारण भटक्या कुत्र्यांनी त्याच्यावर हल्ला केला असता तर कदाचित त्याचा जीवदेखील गेला असता. परंतु जागतिक वनदिनाच्या पूर्वसंध्येला वाट चुकलेल्या नील गायीच्या वासराला सुखरूप जंगलात सोडल्यामुळे वनविभागासह वन्यप्रेमींमध्ये आनंदाचे वातावरण आहे. नील गायीचे हे वासरू त्याचे कळप शोधण्यात यशस्वी होईल, अशी सर्वांना आशा आहे.