वैद्यकीय अधिकाऱ्यांची कमतरता रुग्णांच्या मुळावर

जागतिक बँकेच्या आर्थिक साहाय्याने सुमारे १५ वर्षांपूर्वी दोंडाईचात उपजिल्हा रुग्णालय सुरू करण्यात आले. रुग्णालय स्थापनेपासूनच वैद्यकीय अधिकारी व इतर कर्मचाऱ्यांची कमतरता आहे. आजही मुख्य वैद्यकीय अधीक्षक पद कायमस्वरूपी नाही. या पदासाठी नेहमी रस्सीखेच असते. कायमस्वरूपी पद नसल्याने कर्मचाऱ्यांवर वचक राहत नाही. काही कर्मचारी इमानदारीने काम करतात, परंतु काही सयाजीराव आजही आहेत. दोडाईचा शहरात कोरोनाबाधित रुग्णांची संख्या वाढत आहे. वाढत्या रुग्णसंख्येने दोंडाईचाकराच्या चिंतेत भर पडत आहे, तर उपस्थित वैद्यकीय अधिकाऱ्यांवर कामाचा ताण वाढत आहे. अशाही विपरीत परिस्थितीत वैद्यकीय अधिकारी काम करीत आहेत. कोरोना महामारीत उपजिल्हा रुग्णालयात कोरोनाबाधित रुग्णावर उपचार होत आहेत. उपजिल्हा रुग्णालयात ५० ऑक्सिजनयुक्त बेड आहेत. मुख्य वैद्यकीय अधीक्षक पद आजही अस्थिर आहे.

वर्ग दोन वैद्यकीय अधिकाऱ्यांची सात पदे आहेत. आज मुख्य वैद्यकीय अधिकारी म्हणून डॉ. ललितकुमार चंद्रे असून, डॉ. अर्जुन नरोटे, डॉ. अमोल भामरे, डॉ. भूषण काटे असे चारच वैद्यकीय अधिकारी उपजिल्हा रुग्णालयात कार्यरत आहेत. वैद्यकीय अधिकारी डॉ. आशिष खोमणे अन्य ठिकाणी कार्यरत आहेत. एकंदरीत फक्त चार वैद्यकीय अधिकाऱ्यांवर उपजिल्हा रुग्णालयाची मदार आहे.

कोरोना महामारीत वैद्यकीय अधिकाऱ्यांची कमतरता रुग्णांच्या मुळावर येऊ पाहत आहे. शासनाने याबाबत गांभीर्य दाखवून तत्काळ वैद्यकीय अधिकाऱ्यांची नेमणूक करावी, अशी मागणी आहे. वैद्यकीय अधिकाऱ्यांबरोबरच परिचारिका पण महत्त्वपूर्ण आहेत. दोंडाईचा उपजिल्हा रुग्णालयात १२ परिचारिका मंजूर असून, ३ परिचारिकांची कमतरता आहे. रक्तपेढी सध्या नावालाच आहे, कारण येथील कर्मचारीसुद्धा कोरोनात कार्यरत आहेत. कोरोनाची बाधा वाढत असताना कोरोना स्वॅब देणे व कोरोना प्रतिबंधक लस घेण्यासाठी अनेक नागरिकांनी पहिल्यांदाच उपजिल्हा रुग्णालय बघितले आहे.